BAYRAQDAR MEDİA – AMEA Rəyasət Heyəti Aparatının “Elektron Akademiya” şöbəsinin təşkilatçılığı ilə Akademiyanın Mərkəzi Elmi Kitabxanasında növbəti Vikipediya təlimlərinin yekunlaşması münasibətilə tədbir keçirilib.
Bu haqda xəbər BAYRAQDAR MEDİA-ya MEK-dən daxil olub.
Xəbərdə bildirilir ki, “tədbirdə MEK-in baş direktoru, Prof. Məmməd Əliyev AMEA-nın N.Gəncəvi adına Ədəbiyyat, M.Füzuli adına Əlyazmalar, A.A.Bakıxanov adına Tarix, Z.Bünyadov adına Şərqşünaslıq, Fəlsəfə və Sosiologiya, eləcə də Azərbaycan İlahiyyat institutlarının əməkdaşlarını təlimləri uğurla yekunlaşdırdıqları üçün təbrik edib. Bu vacib məsələdə göstərdikləri diqqətə görə təşəkkürünü bildirib”.
Sonra xəbərdə, “YAP Yasamal Rayon Təşkilatının sədri Bəxtiyar Nəbiyev gənclərin onlayn platformadakı aktivliklərini yüksək qiymətləndirib və ötən günlərdə Azərbaycanın keçirdiyi uğurlu antiterror tədbirlərindən söz açıb” deyə bildirilir.
Tədbirdə çıxış edən “Elektron Akademiya” şöbəsinin baş mütəxəssisi Elnur Eltürk Azərbaycanda Vikipediya hərəkatının məhz MEK-dən başlandığını vurğulayıb. O, öncəki illərlə müqayisədə məqalələrin keyfiyyəti və sayının artmasında həmin komandanın xidmətlərini xatırladıb.
MEK-in Elektron resurslar şöbəsinin müdiri Reyhan Əhmədova çıxışı zamanı iştirakçılara bir ay ərzində onlayn platformada məqalələrin yaradılması, redaktəsi qaydalarının öyrədildiyindən danışıb.
Sonda təlimçilərə, iştirakçılara diplom və sertifikatlar təqdim olunub.
