Son yeniləmə: 28 Sentyabr 2023 13:26
BAYRAQDAR MEDİA – Türkiyənin Elm Yayma Vəqfinin və Dünya Etnoidman Konfederasiyasının sədri Bilal Erdoğan Türkiyə Dəyanət Vəqfi Bakı Türk Liseyini və Azərbaycan İlahiyyat İnstitutunu ziyarət edib.
Bu barədə Türkiyənin Azərbaycandakı səfirliyindən məlumat verilib.
Bildirilib ki, qonaq əvvəlcə Türkiyə Dəyanət Vəqfi Bakı Türk liseyində olub: “Liseyin konfrans zalında 27 sentyabr Anım Günü münasibəti ilə tədbir təşkil edilib və fəxri qonaqla görüş keçirilib. Görüş tədbirində vətənimizin azadlığı uğrunda canlarından keçən şəhidlərimizin ruhu bir dəqiqəlik sükutla yad edilib. Azərbaycan Respublikasının dövlət himni və Türkiyə Cümhuriyyətinin istiqlal marşı səsləndirilib”.
Daha sonra şəhidlərin ruhuna Türkiyə Cümhuriyyəti Diyanət İşləri Başqanlığı Müshəf Tədqiqləri və Qiraət şurasının üzvü Fatih Okumuş tərəfindən Qurani-Kərimdən ayələr tilavət edilib. Tədbirdə çıxış edən Türkiyə səfirliyinin dini işlər üzrə müşaviri İhsan Açık tədbirin təşkili üçün məktəb kollektivinə təşəkkür edib və qonağa öz dəyərli vaxtını ayırıb şagirdlərlə görüşə gəldiyi üçün öz minnətdarlığını bildirib.
Məlumata görə, daha sonra Bilal Erdoğan ona ünvanlanan sualları cavablandırıb: “Təhsilin insan həyatındakı önəminə diqqət çəkən B.Erdoğan modern dünyanın ən böyük silahının güclü təhsil olduğunu qeyd edib. Ən çox sevdiyi idman sahəsi hansıdır sualına isə qonaq, oxçuluq olduğunu qeyd edib və oxçuluğun tarixindən danışıb. O eyni zamanda milli kimliyin əhəmiyyətindən də bəhs edib. Tədbirdə şagirdlərin ifasında şəhidlərə həsr edilmiş şeirlər dinlənilib. Tədbirin sonunda məktəb rəhbərliyinə qonaqlar tərəfindən xatirə hədiyyələri təqdim edilib və xatirə şəkilləri çəkilib”.
Daha sonra B.Erdoğan Azərbaycan İlahiyyat İnstitutunu ziyarət edib: “İnstitutun rektoru Aqil Şirinov tərəfindən qaşılanan qonağa universitetin fəaliyyəti, tələbələrə yaradılan imkanlar haqqında geniş məlumat verilib. Sonra İnstitutun konfrans zalında tələbə və akademik müəllim heyəti ilə görüş keçirilib. Tədbirin açılış qismində 27 Sentyabr Şəhidlərimizin Anım günü münasibəti ilə vətənimizin azadlığı uğrunda əziz canlarından keçən şəhidlərimizin ruhuna Türkiyə Cümhuriyyəti Diyanət İşləri Başqanlığı Müshəf Tədqiqləri və Qiraət şurasının üzvü Fatih Okumuş tərəfindən Qurani-Kərimdən ayələr tilavət edilib”.
Sonra Azərbaycan İlahiyyat İnstitutunun rektoru Aqil Şirinov və Türkiyə səfirliyinin dini işlər üzrə müşaviri İhsan Açık çıxış ediblər.
Daha sonra B.Erdoğan ona ünvanlanan sualları cavablandırıb: “Bilal Erdoğan özünün uşaqlıq və dünyanın ən nüfuzlu universitetlərindəki tələbəlik illərindən danışaraq tələbələrlə öz təcrübəsini paylaşıb. O, eyni zamanda tələbələrə öz sahələrində yaxşı mütəsəssiz olmalarını və çox çalışmalarını tövsiyyə edib. Elmin son dövrlər avropadan şərqə doğru inteqrasiya etdiyini vurğulayan natiq Aziz Sancarların, Səlcuk Bayraktarların bu həqiqətin ən bariz numunəsi olduğunu qeyd edib”.
