BAYRAQDAR MEDİA – Azərbaycan Dövlət Gənc Tamaşaçılar Teatrında “İRƏLİ” İctimai Birliyinin iştirakı ilə 27 Sentyabr – Anım Gününə həsr olunmuş “Balaca kişilər” tamaşasının nümayişi keçirilib.
Bu haqda xəbər BAYRAQDAR MEDİA-ya sözügedən Teatrdan daxil olub.
Xəbərdə bildirilir ki, “GTT-nın 96-cı mövsümündə nümayiş olunan tamaşada dövlət rəsmiləri, qeyri-hökumət təşkilatlarının nümayəndələri, media mənsubları, şəhid ailələri və gənclər iştirak ediblər. Tədbirdə “İRƏLİ” İctimai Birliyin sədri Şahin Rəhmanlı açılış nitqi ilə çıxış edərək, Prezident İlham Əliyevin rəhbərliyi altında 44 gün ərzində Azərbaycan ordusunun tarixi qələbəsindən, xalqın göstərdiyi birlik və həmrəylikdən söhbət açıb. 27 Sentyabr – Anım Günü çərçivəsində “Balaca Kişilər” tamaşasının nümayişinin keçirilməsinə görə GTT-na minnətdarlığını bildirən Ş.Rəhmanlı teatrın fəaliyyətində uğurlar arzu edib, birgə əməkdaşlıqdan məmnunluğunu ifadə edib”.
Sonra xəbərdə, “tədbirin davamında əsərin müəllifi, yazıçı İlqar Fəhmi və quruluşçu-rejissor, Əməkdar artist Nicat Kazımov çıxış edərək tamaşanın hərbi-vətənpərvərlik mövzusunda əhəmiyyətindən, teatrın yeni mövsümdə nümayiş etdirəcəyi müxtəlif tamaşalardan söz açıblar. Daha sonra “Balaca kişilər” tamaşası təqdim edilib. Səhnə əsərində Əməkdar artistlər Şövqi Hüseynov, Rasim Cəfər, Elnur Bəhramxan, aktyorlar Rəşad Səfərov, Anar Seyfullayev, Ceyhun Məmmədov, Araz Pirimov, Bəhram Əliheydər, Nurlan Süleymanlı, Xaliq Bəkirov, Hüseyn Bayramov, Ümman Budaqov, İlham Sadıqov, Ramiq Nəsirov, Müşfiq Əliyev, Mirzəağa Mirzəyev rol alıblar”.
Tamaşanın sonunda şəhid ailələrinin üzvləri və qazilər alqış sədaları altında səhnəyə dəvət olunub.
Qeyd edək ki, yazıçı-dramaturq İlqar Fəhminin eyniadlı əsəri əsasında hazırlanan tamaşa İkinci Qarabağ müharibəsində baş verən real hadisələri əks etdirir. Əsər “Balaca kişilər”in şücaətindən, onların müharibənin fonunda qəhrəmana çevrilə bilmə bacarıqlarından bəhs edir. 44 günlük savaş və qələbəyə ithaf edilən tamaşa vətənpərvərlik, insani dəyərlərin qorunması ilə yanaşı, həm də hər bir vətəndaşın torpağa bağlılığını, mənəvi və bəşəri dəyərlərə sadiqliyini təcəssüm etdirir.
