BAYRAQDAR MEDİA – Sentyabrın 21-də Elm və Təhsil, həmçinin Rəqəmsal İnkişaf və Nəqliyyat nazirliklərinin dəstəyi ilə Sumqayıt şəhərində yerləşən İstedad liseyinin nəzdində yaradılmış STEAM və İnnovasiyalar Mərkəzinin açılış mərasimi olub.
Bu haqda xəbər BAYRAQDAR MEDİA-ya ETN-dən daxil olub. Xəbərdə bildirilir ki, “açılış mərasimində elm və təhsil naziri Emin Əmrullayev, rəqəmsal inkişaf və nəqliyyat naziri Rəşad Nəbiyev, Sumqayıt Şəhər İcra Hakimiyyətinin başçısı Zakir Fərəcov iştirak ediblər. Qonaqlar məktəbin müəllim və şagird kollektivi ilə görüşüb, mərkəzdə yaradılmış şəraitlə tanış olublar. Bildirilib ki, mərkəzin yaradılması istedadlı şagirdlərin potensialının artırılması, eləcə də onların yerli, beynəlxalq olimpiada və müsabiqələrə hazırlanmasının təşkili məqsədi daşıyır”.
Sonra xəbərdə, “E.Əmrullayev mərkəzin təhsildə yeni yanaşma, həmçinin innovativ tədris metodlarının tətbiqi baxımından əhəmiyyətli olacağını vurğulayıb. 2023–2024-cü tədris ilində STEAM əsaslı təhsilin əhatə dairəsinin genişləndirildiyini qeyd edən nazir bildirib ki, əsas məqsəd təhsil alanların innovativ ideyalarının reallaşdırılmasında müasir texnologiyaların tətbiqinin təmin olunması, həmçinin süni intellektin iqtisadiyyatın müxtəlif sahələrində istifadəsi bacarıqlarının formalaşdırılmasıdır” deyə qeyd olunur.
Rəqəmsal inkişaf və nəqliyyat naziri R.Nəbiyev bildirib ki, güclü insan kapitalı yaratmaq, Azərbaycanı innovasiya məkanına çevirmək üçün ilk növbədə dəqiq elmlər, texnologiyalar və İT üzrə biliklər artırılmalı, bu sahədə mütəxəssislər yetişdirməyə nail olunmalıdır. Nazir deyib ki, burada şagirdlərin riyaziyyat, kimya, informatika, robotiks sahələrində bilik və bacarıqlarının aşkarlanaraq inkişaf etdirilməsi, eləcə də innovativ təhsil layihələrinin həyata keçirilməsi nəzərdə tutulur. Açılışda çıxış edən Sumqayıt Şəhər İcra Hakimiyyətinin başçısı Z.Fərəcov məktəblilər üçün yaradılan innovativ şəraitə görə təşəkkürünü bildirib. Daha sonra təhsil müəssisəsinin yeni təmir olunmuş kitabxanasına baxış keçirilib. Sonda məktəb kollektivi ilə xatirə fotosu çəkdirilib.
