Son yeniləmə: 15 Sentyabr 2023 11:07
Prof. Dr. Şükrü Beydemir: Hesab edirik ki, türk dövlətləri arasında təhsil sahəsində əməkdaşlıq daha da inkişaf etməli və dərinləşməlidir
BAYRAQDAR MEDİA – “Biz həm türk və İslam dünyası, həm də Qərb dünyası ilə təhsil sahəsində əlaqələrə malikik. Amma müəllim-tələbə mübadiləsi üçün əsasən türk dünyasına üstünlük veririk. Hesab edirik ki, türk dövlətləri arasında təhsil sahəsində əməkdaşlıq daha da inkişaf etməli və dərinləşməlidir”.
Bunu BAYRAQDAR MEDİA-ya özəl müsahibəsi zamanı qardaş Türkiyənin Bilecik Şeyh Edebali Universitetinin rektoru Prof. Dr. Şükrü Beydemir deyib. Qeyd edək ki, müsahibəni yaxın günlərdə oxucularımıza təqdim edəcəyik.
Onun sözlərinə görə, bu baxımdan Türk Dövlətləri Təşkilatı Türk Universitetləri Birliyinin (TÜRKÜNİB) yaranması mühüm addımdır: “Biz də də Bilecik Şeyh Edebali Universiteti olaraq orada təmsil olunmaq üçün müraciət etmişik. Yəqin ki, yaxın vaxtlarda müsbət cavab alınacaq”.
Rektor qeyd edib ki, türk dünyası olaraq təhsil sahsəində birlikdə olmağın, eyni nöqtəyə vurmağın çox gözəl mənası var: “Bu hər bir ölkə üçün müsbət nəticələr vəd edir. Təkcə səhiyyəni götürsək, deyə bilərik ki, Türkiyə səhiyyə sahəsində irəlidə olan ölkədir və bu istiqamətdə təhsildə öz təcrübəsini digər qardaş ölkələrlə bölüşərək ümumilikdə yeni uğurlar əldə edə bilər. Digər ölkələrin də başqa sahələrdə liderliyi var. Məsələn, mədəniyyət və incəsənətdə ciddi şəkildə öndə olan ölkə Azərbaycandır. Bir sözlə, bir-birimizdən çox şeylər öyrənə bilərik. Təhsil birliyi dediyiniz, əslində, budur”.
