BAYRAQDAR MEDİA – Kolumbiyanın məşhur “Atlantik” radiosunun internet səhifəsində “Ermənistan-Azərbaycan Qarabağ müharibəsinin digər üzü” başlıqlı məqalə dərc olunub.
Bu barədə BAYRAQDAR MEDİA-ya Azərbaycanın Meksikadakı səfirliyindən məlumat verilib.
Qeyd edilib ki, “məqalədə kolumbiyalı jurnalist Paola Varqas ölkəmizə səfəri zamanı işğaldan azad olunmuş ərazilərdə şahidi olduğu vəhşiliklərdən söhbət açır, məqsədinin “Azərbaycanın üzləşdiyi barbarlığı” oxuyucuların diqqətinə çatdırmaq olduğunu bildirir. Jurnalist qeyd edir ki, otuz ilə yaxın müddətdə Ermənistanın işğalı altında olmuş Qarabağda törədilən ağlasığmaz vəhşiliklərin izləri hələ də qalır. Viran qoyulmuş, dağıdılmış və minalarla çirkləndirilmiş bu ərazilərin yenidənqurulması və bərpası kifayət qədər vaxt tələb edir”.
P.Varqas erməni işğalından öncə dinamik həyata və sosial-iqtisadi inkişafa malik Azərbaycan şəhərlərinin xarabalığa, “kabus şəhər”ə çevrilməsindən dəhşətə gəldiyini, Gəncə şəhərində yaşayış məntəqəsinə raketlərlə hücumun həyata keçirildiyi yerdə gördüklərinin onu daha da hiddətləndirdiyini vurğulayaraq qeyd edib: “Ermənistanın günahsız insanlara hücum etməkdə məqsədi nə idi? Niyə beynəlxalq kütləvi informasiya vasitələrində bu həqiqətlərdən danışılmır?”
Kolumbiyalı jurnalist işğaldan azad olunmuş ərazilərimizdə erməni vandalizminin silinməz izləri ilə yanaşı, Azərbaycan Hökuməti tərəfindən aparılan genişmiqyaslı bərpa-quruculuq işlərinin şahidi olduğunu yazır, uğurla və sürətlə davam etdirilən tikinti və abadlıq işlərinin, iri layihələrin bu ərazilərə tezliklə həyatın qayıdacağını deməyə əsas verdiyini bildirir.
Məqalədə, həmçinin Azərbaycan Prezidentinin köməkçisi − Azərbaycan Respublikası Prezidenti Administrasiyasının Xarici siyasət məsələləri şöbəsinin müdiri Hikmət Haciyevlə görüşdən sitatlara yer verilir və Qarabağın erməni sakinlərinin ölkəmizin bərabərhüquqlu vətəndaşları hesab olunacaqları və təhlükəsizlik zəmanətinə malik olacağı, eləcə də Azərbaycanın sülhün tərəfdarı olduğu və Ermənistan rəhbərliyinin məsuliyyətsiz və təxribat xarakterli bəyanatlarının yolverilməzliyi vurğulanır.
