Son yeniləmə: 11 Sentyabr 2023 10:13
Karamanoğlu Mehmetbey Üniversitetinin rektoru Azərbaycana səfər edib
BAYRAQDAR MEDİA – Ötən həftə qardaş Türkiyənin Karamanoğlu Mehmetbey Üniversitetinin rektoru Prof. Dr. Mehmet Gavgalı Bakıya səfər edib. Səfərdə məqsəd Azərbaycanın müxtəlif universitetlərinin rəhbərləri, həmçinin, valideyn və gənclərlə görüşmək olub.
Bu barədə BAYRAQDAR MEDİA-ya görüşün təşkilatçısı Lider Grupdan məlumat verilib.
Bildirilib ki, səfər olduqca məhsuldar keçib: “Səfər çərçivəsində Azərbaycanda ümumilikdə 6 universitet rəhbərliyi ilə görüşlər keçirilib. Görüşlərdə ali məktəblər arasında müxtəlif sahələrdə əməkdaşlıq imkanları müzakirə olunub. Rektor Mehmet Gavgalı rəhbərlik etdiyi universitetin 22 min tələbəsi olduğunu vurğulayaraq 16 illik fəaliyyət dövründə universitetin böyük uğurlar qazandığını bildirib. Qeyd edilib ki, hazırda 11 fakültəsi olan universitet bu il ilk dəfə olaraq tibb fakültəsindən məzunları yola salıb”.
Prof. Dr. Mehmet Gavgalı öz növbəsində BAYRAQDAR MEDİA-ya özəl açıqlamasında “Bura həm daha çox azərbaycanlı gəncin bizi seçməsi, həm də ikitərəfli əlaqələri genişləndirmək üçün gəldik. Burada 6 universitet rəhbəri ilə məhsuldar görüşlər keçirdik. Gələcəkdə elmi araşdırmalar istiqamətində geniş müzakirələr apardıq. Görüşlər çərçivəsində müəllim və tələbə heyəti mübadiləsinə dair protokollar imzaladıq. Bizə göstərdikləri diqqətə görə dəyərli rektorlara minnətdarlıq edirəm. Bundan sonra istər Erasmus, istər Mövlana, istərsə də Orhun porqramı çərçivəsində mübadilə həyata keçirəcəyik” deyib.
Qeyd edək k, Prof. Dr. Mehmet Gavgalı BAYRAQDAR MEDİA-ya özəl müsahibə verib. Müsahibəni yaxın günlərdə oxuculara təqdim edəcəyik.
