Cavid Aydın: Hazırda Eskişehirdə bir Azərbaycan rüzgarı əsir
BAYRAQDAR MEDİA – Xəbər verdiyimiz kimi, bu gün Türkiyənin Eskişehir şəhərində futbol üzrə Avropa çempionatının Türkiyə-Ermənistan oyunu olacaq.
Onu da bildirmişdik ki, UEFA-nın qərarı ilə həmin oyuna Azərbaycan bayraqlarının keçirilməsi qadağan olunub. Öz növbəsində Türkiyə Futbol Federasiyasının qərarına əsasən, sentyabrın 8-də Eskişehir Atatürk Stadionunda baş tutacaq oyuna Azərbaycan bayraqları buraxılmayacaq.
Buna qəti şəkildə etiraz edən Türkiyə Azərbaycan Dərnəkləri Federasiyası və Eskişehir Azərbaycanlılar Dərnəyi (EsAzDer) həmin futbola soydaşlarımızn getməməsinə qərar veriblər. Həmçinin, EsAzDer eskişehirlilərə müraciət edərək, hər kəsi 8 sentyabrda evlərə, maşınlara, dükanlara Azərbaycan və Türkiyə bayraqlarını asmağa çağırıb.
Bu çağırış isə eskişehirlilər tərəfindən müsbət qarşılanıb. Eskişehir Azərbaycanlılar Dərnəyinin sədri Cavid Aydın BAYRAQDAR MEDİA-ya bildirib ki, günün ilkin saatlarından etibarən bütün Eskişehir Azərbaycan bayrağına bürünüb: “Hazırda Eskişehirin hər yerində üçrəngi Azərbaycan bayrağı asılıb. Bütün Eskişehir Azərbaycan bayrağına bürünüb. Bir sözlə, hazırda Eskişehirdə bir Azərbaycan rüzgarı əsir. Çağırışımıza dəstək verən dəyərli eskişehirlilərə minnətdarlıq edirəm”.
C.Aydının sözlərinə görə, dünya bir daha gördü ki, hansı qurumların nə qərar qəbul etməsindən aslı olmayaraq Türkiyə-Azərbaycan qardaşlığı əbədidir. Bu qardaşlığı pozmağa heç kimin, heç bir qüvvənin gücü çatmaz”.
