Telman Nüsrətoğlu: Hesab edirəm ki, Ağdamdakı Rusiya-Türkiyə Birgə Monitorinq Mərkəzinə bənzər bir model Avropaya münasibətdə də tətbiq edilə bilər
BAYRAQDAR MEDİA – “İstər ABŞ-Çin və ABŞ-Rusiya mübarizəsi kontekstindən, istərsə də artıq qaçılmaz hala gələn çoxqütüblü dünya reallığı baxımından Türkiyə vazkeçilməz, balans yaradan, proseslərin gedişinə istiqamət verən bir ölkədir. Bu mənada təsadüfi deyil ki, Putin-Erdoğan görüşü dünyanın fərqli paytaxtlarında diqqətlə izlənilib”.
Bunu BAYRAQDAR MEDİA-ya özəl açıqlamasında tarix elmləri doktoru, Türk İslam Araşdırmaları Mərkəzinin başqanı Telman Nüsrətoğlu deyib.
O, qeyd edib ki, görüşü diqqət mərkəzinə gətirən bir çox beynəlxalq, qlobal xarakterli məsələlər var idi: “Bu sırada ilk yerlərdən birini Qara Dəniz hövzəsinə sülhün gəlməsi, Rusiya-Ukrayna müharibəsinin dayandırılması istiqamətində atılan addımların müzakirəsi gəlir. Həmçinin, dünyanın maraqla həllini gözlədiyi taxıl böhranı, geniş coğrafiyalarda, o cümlədən Afrikada son durum, xüsusilə də Güney Qafqazdakı vəziyyət bu görüşdə geniş müzakirə edilib”.
Türkiyənin Güney Qafqaz məsələsindəki, “qırmızı cizgisi” bəllidir
T.Nüsrətoğlunun sözlərinə görə, Türkiyənin Güney Qafqaz məsələsindəki, necə deyərlər “qırmızı cizgisi” bəllidir: “Azərbaycanın ərazi bütövlüyünün tanınması, separatçı, işğalçı qalıqlarının bir an öncə bizim torpaqları tərk etməsi və sayın Recep Tayyip Erdoğanın Vilnüs sammitində də bəyan etdiyi kimi, 2025-ci ildə Rusiya sülhməramlılarının müddəti başa çatanda Azərbaycan torpaqlarını tərk etmələri bu “qırmızı cizgi”yə daxildir”.
Burada məsələ Rusiyanın öz imperialist maraqlarından vaz keçə bilməsindən də aslıdır
“Ən əsası bu görüş bir daha sübut etdi ki, Türkiyə-Rusiya münasibətləri tamamilə yeni mərhələyə qədəm qoyub” deyən müsahibimiz bildirib ki, bu, öz növbəsində Avropadakı proseslərə də təsir edə bilər: “Söhbət tərəflərin biri-birinin maraqlarını nəzərə almasından gedir. Bu baxımdan, hesab edirəm ki, Ağdamdakı Rusiya-Türkiyə Birgə Monitorinq Mərkəzinə bənzər bir model Avropaya münasibətdə də tətbiq edilə bilər. Yəni, Rusiya-Türkiyə birliyi kənar oyunçuları Güney Qafqaza və digər bəlli coğrafiyalara buraxmaya bilər. Bir sözlə, Türkiyə-Rusiya əməkdaşlığına ümid, o cümlədən əməkdaşlıq imkanları genişdir. Lakin təbii ki, burada məsələ Rusiyanın öz imperialist maraqlarından vaz keçə bilməsindən də aslıdır”.
Bu, hər kəs üçün müsbət nəticələnəcək
Bildirilib ki, “Rusiya Türkiyənin və türk dünyasının da maraqlarını diqqətə alan bir uzlaşma siyasəti həyata keçirə bilsə, bu, hər kəs üçün müsbət nəticələnəcək. Bunun üçün də Qarabağ bir test məkanı kimi götürülə bilər. Yəni, əgər Rusiya səmimi davranış sərgiləsə bəzi xarici güclərin Qarabağa girmək istəməsinin qarşısı asanlıqla alına bilər. Bu baxımdan düşünürəm ki, Soçi görüşündə Türkiyə-Azərbaycan-Rusiya əməkdaşlığının möhkəmləndirilməsi də diqqət mərkəzində olub”.
