BAYRAQDAR MEDİA – “Prezident İlham Əliyevin avqustun 28-də imzaladığı Sərəncamla təsdiqlənən Dövlət Proqarmı vacib bir sənəddir. Çünki, bu, birbaşa sosial xidmətlərə ünvanlanan proqramdır. Hesab edirəm ki, bu Dövlət Proqramı həm Azərbaycanda sosial işin genişləndirilməsinə, həm də bütövlükdə sosial xidmətlər sahəsində daha innovativ metodlardan, yollardan istifadəyə imkan yaradacaq”.
Bunu Milli Məclisin deputatı Vüqar Bayramov Prezident İlham Əliyevin Sərəncamı ilə təsdiqlənən “Azərbaycan Respublikasında sosial xidmətin inkişafına dair 2023–2026-cı illər üçün Dövlət Proqramı” haqqında dəyərləndirməsində deyib.
BAYRAQDAR MEDİA-ya özəl açıqlamasında millət vəkili qeyd edib ki, bu kontekstdə sosial xidmətlərlə bağlı proqrama diqqət yetirsək, bu Dövlət Proqramının bır sıra özəlliyinin olduğunu deyə bilərik: “Əvvəla, praktik olaraq ölçüləbilən məsələlər öz əksini tapıb. Bunlar illər üzrə qruplaşdırılıb. Konkret indiqatorlar var. Bu indiqatorlar da proqramın icrası və monitorinqi baxımından çox vacibdir”.
Deputatın sözlərinə görə, proqram imkan verəcək ki, sosial xidmət müəssisələrinin, eləcə də təhsil müəssisələrinin məzunu olan, valideynlərini itirmiş və ya valideyn himayəsindən məhrum olmuş 400 uşaq dövlət tərəfindən mənzillə təmin olunsun: “Bu, onların pulsuz olaraq mənzil təminatının həyata keçirilməsi anlamına gəlir. Eyni zamanda, proqramda dörd şəhər və rayonda mobil xidmət mərkəzləri vasitəsilə ən azı 200 nəfərin əlilliyinin müəyyən edilməsi və 150 ahıl şəxsə mobil xidmətlərin göstərilməsi nəzərdə tutulub. Həmçinin, 220 uşağın ailəyə qaytarılması və 250 uşağın stasionar müəssisəyə düşməsinin qarşısının alınması, dövlət sifarişi ilə sosial xidmət sahəsimndə həyata keçirilən layihələrin sayının hər il 10 faiz artırılması, ən azı 120 uşağın himayədar ailəyə verilməsi kimi tədbirlər nəzərdə tutulur. Ona görə bu tədbirlər bütövlükdə sosial sferada dövlət təminatının gücləndirilməsinə və həssas qrupların daha yaxından faydalanmasına imkan yaradacaq”.
