BAYRAQDAR MEDİA – Türkiyənin Milli Təhsil Nazirliyinə (MEB) tabe olan ibtidai və orta təhsil müəssisələrində 2023-2024-cü tədris ili sentyabrın 11-i bazar ertəsi günü başlayacaq. Məktəbəqədər, ibtidai sinif birinci və orta məktəb 9-cu sinif şagirdləri məktəblə ilk dəfə qarşılaşacaq və ya yeni səviyyəyə keçəcəklər.
Bu barədə Milliyet məlumat yayıb.
Məlumatda deyilir ki, nazirlik tərəfindən yeni tədris ilində təhsilin keyfiyyətinin yüksəldilməsi, məktəblər arasında imkan bərabərliyinin təmin edilməsi və şagirdlərin sağlam inkişafına töhfə vermək məqsədilə silsilə tədbirlər həyata keçirilib: “Avqustun 21-də milli təhsil naziri Yusuf Tekinin imzası ilə əyalətlərə göndərilən təlimatlardan ən diqqət çəkəni son illərdə bir çox ölkədə məktəblərdə qadağan olunmuş cib telefonları ilə bağlı olub. Sərəncamda qeyd olunur ki, şagirdlərin məktəbdə və sinif otaqlarında mobil telefondan dərslərini pozacaq şəkildə istifadə etmələrinin qarşısının alınması və bu cür cihazlarla sinif otaqlarına daxil olmamaları üçün tədbirlər görüləcək. Bundan əlavə, piylənmə və rəqəmsal asılılığa qarşı bir tədbir olaraq, Nazirlik şagirdlərin təbii mühitlərdə dostları ilə daha çox oynayaraq sosial yönlərini inkişaf etdirmələri üçün məktəblərdə təkmilləşdirmələr aparılacağını açıqlayıb”.
Məlumata əsasən, hazırda bu məsələ, yəni sinifdə mobil telefon və ya informasiya vasitələrindən istifadənin konsentrasiyanı pozduğu, dərsə uyğunlaşmanı çətinləşdirdiyi bütün dünyada müzakirə olunur: “Nəhayət, UNESCO şagirdlərin məktəblərdə smartfonlardan istifadəsini qadağan etmək üçün qlobal çağırış edib və qeyd edib ki, mobil telefondan istifadə zəif təhsil göstəricilərinə yol açır. Fransa, Rusiya, Çin və Səudiyyə Ərəbistanında məktəblərdə mobil telefonlar qadağan edilib. Regional qadağa ABŞ və İspaniyada tətbiq edilir. Hollandiyada bu qadağa 2024-cü il yanvarın 1-dən qüvvəyə minəcək. Finlandiya və İngiltərədə də qadağan gündəmdədir”.
