BAYRAQDAR MEDİA – Denizli Böyükşəhər Bələdiyyəsinin sədri Osman Zolan Kosovanın regional inkişaf naziri Fikrim Damka və onu müşayiət edən şəxsləri qəbul edib.
Bu barədə BAYRAQDAR MEDİA-ya Denizli Böyükşəhər Bələdiyyəsindən məlumat verilib.
Bildirilib ki, səfər Avrasiya İcraçı Sənayeçi və İş Adamları Dərnəyi (AYSİAD) Denizli şöbəsinin dəvəti çərçivəsində reallaşıb.
Səfərdən çox məmnun olduğunu bildirən O.Zolan deyib:“Denizliyə xoş gəlmisiniz. Biz ürək qardaşlarıyıq. Ümid edirəm ki, bu, bizə həmrəylik içində bir-birimizin gözəlliklərini üzə çıxarmağa imkan verəcək. Biz əməkdaşlıq yolu ilə qardaşlığımızı gücləndirməliyik. Sizinlə olmaq bizə güc verir, bizi sevindirir. Tariximizdə əcdadlarımızın olduğu Kosovanın çox mühüm yeri var”.
F.Damka öz növbəsində onları səmimi qarşıladığına görə O.Zolana təşəkkür edib: “Məqsədimiz həm Denizlini tanımaq, həm də Denizli bölgəsindəki iş adamları ilə bir araya gəlməkdir. Yaxşı əməkdaşlıqlar olacaq. Türkiyə Cümhuriyyətinin Balkanlarda çox əhəmiyyətli yeri var”.
Çıxışlardan sonra bələdiyyə sədri O.Zolan və nazir F.Damka səfərin xatirəsinə bir-birlərinə hədiyyələr təqdim ediblər.
