BAYRAQDAR MEDİA – Prezident Sadır Caparov Oş vilayətindəki Toloikon ippodromunda Qırğızıstanın müstəqilliyinin 32-ci ildönümü şərəfinə təşkil olunmuş alaman bayqasında at yarışlarının qaliblərini mükafatlandırıb.
Bu barədə Bulak.kg məlumat yayıb.
Bildirilib ki, Sadır Caparov birinci yerə çıxan idmançıya Oş şəhərində bir otaqlı mənzilin açarlarını təqdim edib.
“Köçəri qırğız xalqı qədim zamanlardan atlara dəyər verib və bu günə qədər xalqımızın həyatının ayrılmaz hissəsi hesab olunur. Bundan əlavə, qədim zamanlardan qırğız xalqı milli idman növlərini gündəlik həyata fəal şəkildə daxil edir ki, onun məqsədi gələcək nəslə mətanət, mərdlik, qəhrəmanlıq, mübarizlik və şərəf aşılamaq olub”, – deyə Sadır Caparov bildirib.
Yarışların digər qaliblərinə də pul sertifikatları təqdim olunub.
