Son yeniləmə: 30 Avqust 2023 15:53
BAYRAQDAR MEDİA – “YAŞAT” Fondunun və “Türkiyə-Azərbaycan İş Adamları və Sənayeçiləri” İctimai Birliyinin birgə təşkilatçılığı, Azərbaycanın milli aviadaşıyıcısı – “Azərbaycan Hava Yolları”nın və Türkiyənin Gənclik və İdman Nazirliyinin dəstəyi ilə İstanbulda yay düşərgəsi keçiriləcək.
Bu barədə BAYRAQDAR MEDİA-ya avqustun 21-də “ASAN xidmət”dən məlumat verilib.
Bildirilib ki, “bununla ələqədar Heydər Əliyev Beynəlxalq Aeroportunda düşərgə iştirakçılarının yolasalınması təşkil olunub. Cari ilin 20-30 avqust tarixində baş tutacaq düşərgədə şəhidlərin 16-18 yaş aralığında olan, ali məktəblərə qəbul imtahanında iştirak etmiş 15 nəfər oğul övladı iştirak edəcək”.
Məlumata görə, düşərgənin məqsədi gənclərin mədəniyyət və təcrübə mübadiləsində iştirakı, yeni dostluqların qurulması və beynəlxalq mühitin öyrənilməsidir: “Düşərgə Türkiyənin Gənclik və İdman Nazirliyinin nəzdində fəaliyyət göstərən “Marmaracık Gənclik Kampı”nda keçiriləcək. Burada şəhid övladları ilə birgə Türkiyənin fərqli bölgələrindən olan gənclər də iştirak edəcəklər. Proqram çərçivəsində müxtəlif idman növləri üzrə yarışların təşkili, seminarların keçirilməsi, ekskursiyalar və xüsusən tarixi Çanaqqalaya səfər nəzərdə tutulub”.
Xatırladaq ki, “YAŞAT” Fondunun təşkilatçılığı ilə hazırda 10 nəfər şəhid övladı isə Almaniyanın Frankfurt şəhərində keçirilən yay məktəbində iştirak edir.
