Səhiyyə Nazirliyinin mütəxəssisi Vəfa Qurbanova: Sonsuzluğun uğurla aradan qaldırılması üçün vaxtında düzgün diaqnoz qoymaq vacibdir
BAYRAQDAR MEDİA – Səhiyyə Nazirliyinin mütəxəssisi Vəfa Qurbanova sonsuzluğun yaranmasının səbəbləri, müalicəsi, genetik sonsuzluq və s. haqda məlumat verib.
Bu haqda xəbər BAYRAQDAR MEDİA-ya sözügedən Nazirlikdən daxil olub.
Xəbərdə qeyd edilir ki, “V.Qurbanova sonsuzluğun yaranma səbəbi haqqında deyib: “insan sağlamlığı genetik, ətraf mühit faktorları, həyat tərzi vərdişləri və mikrobiotanın tərkibi arasında mürəkkəb və balanslı qarşılıqlı əlaqənin nəticəsidir. Bu mürəkkəb prosesdə iştirak edən hər komponentin rolunun dərk olunması bir çox xəstəliklərin yaranma mexanizmləri ilə yanaşı, diaqnostika, müalicə və profilaktikası üçün vacib informasiya verə bilər. Reproduktiv nəticələrin yaxşılaşdırılması üçün qeyd edilən faktorların rolu çox aktualdır. Genetik, mikrobiom, həyat tərzi və yaşadığımız mühit arasındakı əlaqələr barədə informasiya həcmi ilbəil artır. Bu da öz növbəsində gələcəkdə sonsuzluğun diaqnostikası və müalicəsində yeni yanaşmaların tətbiqinə imkan verəcək””.
Bir çox hallarda sonsuzluğun səbəbinin cütlükdə genetik faktorlarla əlaqəli olduğunu deyən mütəxəssis-ekspert bildirib ki, problemi müəyyən etmək üçün qadın və kişi genotipində kariotip pozğunluğun olub-olmaması təyin edilməlidir, bu məqsədlə mütəxəssis genetik konsultasiyası və xüsusi laborator müayinə üsullarından istifadə olunmalıdır.
V.Qurbanova sonsuzluğun müalicə ilə aradan qalxması haqda da danışıb: “Sonsuzluğun uğurla aradan qaldırılması üçün mümkün qədər tez və maksimal effektiv şəkildə hamilə qalmamağa səbəb ola bilən diaqnozu qoymaq lazımdır. Burada müasir təbabətin tələblərinə uyğun olaraq və sübutlu standartlara əsaslanaraq “4P” prinsipinə uyğun addımlamaq lazımdır – xəstəliklərin inkişafını proqnozlaşdırmaq (prediksiya); xəstəliklərin baş verməsinin qarşısının alınması (prevensiya və ya profilaktika); hər bir xəstəyə fərdi yanaşma (personalizasiya); xəstənin tibbi tədbirlərdə motivasiyalı iştirakı (partisipasiya). Təbii ki, ilk mərhələ mümkün qədər bütün risklərin düzgün qiymətləndirilməsidir. Bu sırada ailəvi və şəxsi anamnestik məlumatlar, yaş faktoru, ekstragenital xəstəliklər, reproduktiv sistemin pozğunluqları, cinsi yolla yoluxan infeksiyaların olması, uşaq və yeniyetmə yaş dövrünün xüsusiyyətləri, reproduktiv davranış, abortların sayı və bir çox digər faktorlar dəyərləndirilməlidir”.
Mütəxəssis-ekspert eləcə də qeyd edib ki, hər bir cütlük üçün müasir standartlara və mövcud imkanlara uyğun olaraq fərdi müayinə və müalicə planı tərtib edilməlidir.
O, həmçinin “Hansı hallarda cərrahi müdaxilə məsləhət görülür?”, “Qadın sonsuzluğuna səbəb ola biləcək xarici faktorlar hansılardır?” kimi sualları da cavablandırıb.
