BAYRAQDAR MEDİA – Xətai Sənət Mərkəzi naturadan işlənmiş əsərlərə ictimai marağın artırılmasına xidmət məqsədi ilə mərkəzin üçüncü mərtəbəsində “Etüd əsərlər guşəsi”ni sənətsevərlərə təqdim edib.
Bu haqda xəbər BAYRAQDAR MEDİA-ya sözügedən Mərkəzdən daxil olub.
Xəbərdə deyilir ki, “XSM Mədəniyyət Nazirliyi, Rəssamlar İttifaqı və Dövlət Rəsm Qalereyası ilə birgə müəyyən dövrlərdə etüd yönlü müxtəlif tədbirlər həyata keçirib. Mərkəz keçirilən tədbirlərdə və ayrı-ayrı zamanlarda rəssamlardan əldə edilən etüd əsərlərdən ibarət bir kolleksiyaya sahib olub. Bu əsərlərin bir hissəsi guşədə sərgilənir. Guşədə Abbasov Fəxri, Abbasov Telman, Allahverdiyeva Nuray, Azər İslam, Əliyev Əbdüləmi, Əvəzov Zahid, Hüseynov Raul, Hüseynov Süleyman və s. etüdçü rəssamların əsərləri yer alır. Bir sənət ocağı olaraq XSM guşəni həmişə yeniləmək və daha fərqli ekspozisiya yaratmağı qarşısına məqsəd qoyub”.
Qeyd edək ki, hər bir rəssam özünün etüd əsərini təklif edə bilər və hər kəs bu əsərlərdən bəyəndiyini əldə edə bilər.
