BAYRAQDAR MEDİA – Qardaş Türkiyənin Ardahan Universitetinin beynəlxalq əlaqələr üzrə koordinatoru Doğan Saltaş Azərbaycan İlahiyyat İnstitutunu (Aİİ) ziyarət edib.
Bu haqda xəbər BAYRAQDAR MEDİA-ya Aİİ-dən daxil olub.
Xəbərdə deyilir ki, “Aİİ-nin Tədrisin təşkili və təlim texnologiyaları üzrə prorektoru, Dos. Mübariz Camalov qonaqlara ali təhsil müəssisəsinin yaranması və fəaliyyəti haqqında geniş məlumat verib. İnstitutun bakalavriat, magistratura və doktorantura pillələri üzrə tədris həyata keçirdiyini söyləyən M.Camalov vurğulayıb ki, Aİİ-də təhsil tamamilə ödənişsizdir. Tədris zamanı bütün dinlər haqqında tələbələrə geniş məlumatlar verildiyini diqqətə çatdıran prorektor İnstitut müəllimlərinin öz sahələrinin peşəkar mütəxəssisləri olduqlarını bildirib”.
Daha sonra xəbərdə bildirilir ki, “Ardahan Universitetinin beynəlxalq əlaqələr üzrə koordinatoru Doğan Saltaş təmsil etdiyi ali təhsil müəssisəsi haqqında məlumat verib. İkitərəfli əməkdaşlıq əlaqələrinin qurulmasında maraqlı olduqlarını qeyd edən D.Saltaş daha sonra bildirib ki, “Erasmus+”, “Mövlana” tipli proqramlar vasitəsilə tələbə, müəllim mübadiləsinin həyata keçirilməsi mümkündür”.
Görüşdə hər iki ali təhsil müəssisəsinin fakültə və kafedraları arasında qarşılıqlı faydalı əməkdaşlığa əsaslanan elmi-tədqiqat işlərinin aparılması; birgə layihələrin reallaşdırılması; professor-müəllim heyəti və təhsilalanlar üçün qarşılıqlı akademik səfərlərin həyata keçirilməsi kimi məsələlər müzakirə olunub.
