Son yeniləmə: 19 İyul 2023 15:04
BAYRAQDAR MEDİA – Türk Əməkdaşlıq və Koordinasiya Agentliyi (TİKA) ilə Monteneqro Bosniya Şurası arasında əməkdaşlıq davam edir.
Bu çərçivədə Monteneqroda cari sosial-iqtisadi fəaliyyətlər, davamlı inkişaf perspektivləri və biznes mühitinin yaxşılaşdırılması mövzusunda panel təşkil edilib.
Yeni Balkan xəbər verir ki, panelə Monteneqronun Baş nazirinin müavini və Bosniya Partiyasının sədri Ervin İbrahimoviç, Monteneqro Bosniya Şurasının sədri və Monteneqro parlamentinin keçmiş deputatı Sulyo Mustafiç, Monteneqro parlamentinin deputatı Amer Smailoviç, Petnitsa meri Samir Aqoviç, Monteneqrodan olan əyalət alimləri və Sarayevodan olan akademiklər Bosniya və Herseqovinadan universitetlər, bank nümayəndələri və iş adamları qatılıblar.
Paneldə çıxış edən Monteneqro Hökumətinin Baş Nazirinin müavini İbrahimoviç, xüsusilə ölkənin şimalında dövlət investisiyaları hesabına yol və turizm infrastrukturunun yaxşılaşdırılması üçün çalışdıqlarını vurğulayıb. O, panelə dəstək verdiyi üçün TİKA-ya təşəkkür edib.
Monteneqro Universitetinin professoru Boban Meloviç inflyasiyadan danışıb. O, iqtisadiyyatın kifayət qədər şaxələndirilməməsi, işsizlik, yüksək dövlət borcu və büdcə kəsiri, demoqrafik dəyişikliklər və sosial bərabərsizliklə üzləşən mövcud sosial-iqtisadi vəziyyətin çətinliklərinə işarə edib.
