BAYRAQDAR MEDİA – AMEA Mərkəzi Elmi Kitabxanasında fəlsəfə doktoru Nailə Səmədovanın “Məmməd Səid Ordubadi memuarı: Həyatım və mühitim” kitabı da var.
Kitab AMEA Məhəmməd Füzuli adına Əlyazmalar İnstitutu Elmi Şurasının 2 fevral 2022-ci il tarixli 2 saylı iclasının qərarı ilə nəşr edilib.
Nəşrdə XX əsr Azərbaycan ədəbiyyatının görkəmli nümayəndəsi M.S.Ordubadinin “Həyatım və mühitim” memuarı əsasında yazıçının həyat və fəaliyyəti incələnib, əsərin əlyazma və nəşr variantları müqayisə edilərək nüsxə fərqləri göstərilib, dövrün ictimai-siyasi, tarixi vəziyyəti təhlil edilib, memuarın yazıçının romanları ilə əlaqəsi, eləcə də əsərin bir yazılı abidə kimi dili və bədii ifadə xüsusiyyətləri nəzərə çatdırılıb.
Kitabda “”Həyatım və mühitim” memuarının əlyazması, süjet və kompozisiyası”, “Dövrün ictimai-siyasi, tarixi və ədəbi olaylarının ”Həyatım və mühitim”də əksi”, “”Həyatım və mühitim” memuarı və Məmməd Səid Ordubadinin romanları”, “”Həyatım və mühitim” memuarı və “Bakıda ikinci kərə” xatirəsi”, “”Həyatım və mühitim” əsərinin dili və bədii ifadə vasitələri” adlı başlıqlar var.
Monoqrafiyanın elmi redaktoru filologiya elmləri doktoru Paşa Kərimov, rəyçilər isə filologiya elmləri doktoru, Prof. Tərlan Quliyev, filologiya üzrə fəlsəfə doktoru, Dos. Əzizağa Nəcəfovdur.
