BAYRAQDAR MEDİA – AMEA Mərkəzi Elmi Kitabxanasındakı nəşrlər sırasında Firidun bəy Köçərli adına Respublika Uşaq Kitabxanasının nəşr etdiyi “Firidun bəy Köçərli. Biblioqrafiya” kitabı da var.
İki hissədən ibarət biblioqrafiya alimin həyat və fəaliyyətinin bütün dövrlərini əhatə edir. I hissədə ictimai xadimin əsərləri, II hissədə isə onun haqqında olan materiallar toplanıb.
Biblioqrafiyanın girişində alimin 150 illik yubileyi haqqında Prezident İlham Əliyevin Sərəncamı yer alır.
Nəşrin F.Köçərliyə yazılan şeirlər hissəsində Abbas Səhhətin “Firidun bəy Köçərli cənablarına” xitabı ilə “Yazamam” şeiri də verilib. Şeirin bir hissəsində deyilir:
Yazamam, məndən olubdur daha bizar qələm,
Mən təfəkkürdə, o sakitliyə məcbur olmuş
Yazamam, boğmadadır ruhumu böhranü ələm,
Xələcanlarla könül çarpmada rəncur olmuş.
Boş kağızlarda qələm cızsa da göz yaşlarımı,
Qıymaram heç unudam sevgili yoldaşlarımı.
Nəşrin tərtibçiləri Nazilə Tahirova, Leyla Qafarova, ixtisas redaktoru və buraxılışa məsul şəxs F.Köçərli adına Respublika Uşaq Kitabxanasının direktoru Şəhla Qəmbərova, ön sözün müəllifi Prof. Zaman Əsgərli, redaktor Əməkdar mədəniyyət işçisi Gülbəniz Səfərəliyevadır.
Qeyd edək ki, kitab ədəbiyyatşünas alimlər, tədqiqatçılar, kitabxanaçı-biblioqraflar və geniş oxucu kütləsi üçün nəzərdə tutulub.
