BAYRAQDAR MEDİA – YARAT Müasir İncəsənət Məkanında keçiriləcək Little YARAT ustad dərslərinin iyun proqramı açıqlanıb.
Bu haqda YARAT-ın yaydığı xəbərdə deyilir.
Xəbərdə bildirilir ki, “ustad dərsləri 11, 18, 25 iyun tarixlərində “Öz qəhrəmanını yarat”, “Simvolikalarla ifadə”, “Fotohekayə” mövzularda olacaq. Türkiyəli gənc yazar Alp Gökalpın dərslərində iştirakçılar yazarın uşaq kitabları ilə tanış olacaqlar. Onlar həmin kitablar əsasında hekayə yaradıcılığının istiqamətlərini, eləcə də arxetiplərin yaradılma prosesini öyrənəcəklər. Praktiki hissədə isə öyrəndiklərinə əsasən öz qəhrəmanlarını rəsm vasitəsi ilə təsvir edəcəklər. Rəssam Ramal Kazımın dərsində iştirakçılar incəsənətin müxtəlif simvolikalarını öyrənəcəklər. Daha sonra bu simvolikalarla sangina və sous qrafika texnikaları vasitəsilə gündəlik həyatda qarşılaşdıqları müəyyən çətinlikləri əks etdirən əsərlər yaratmağa çalışacaqlar. Fotoqraf Eltac Zeynalov dərsində isə iştirakçılara fotohekayə və portret janrından, daha sonra fotokompozisiyaların qurulmasından bəhs edəcək. Praktiki hissədə isə ustad dərsinin iştirakçıları fotoportretlər yaradacaqlar”.
Qeyd edək ki, dərslər saat 12:00-da başlayacaq.
