Son yeniləmə: 7 İyun 2023 16:33
BAYRAQDAR MEDİA – AMEA Mərkəzi Elmi Kitabxanasında yer alan qiymətli nəşrlərdən biri də MEK-in İnnovativ layihələr və metodiki təminat şöbəsinin rəhbəri Səyyarə Məmmədovanın “Nizami Gəncəvi irsinin kitabxanalarda təbliği” (AMEA elmi kitabxanaları üçün metodik vəsait) kitabıdır.
Kitabda AMEA elmi-tədqiqat institutlarının kitabxanalarında dahi Azərbaycan şairinin 880 illiyi ilə əlaqədar yubiley tədbirlərinin keçirilməsi üsulları və formaları haqqında məlumat verilir.
Kitabın tərtibçisi S.Məmmədova metodik vəsaitlə bağlı BAYRAQDAR MEDİA-ya ətraflı məlumat verdi: “Bildirim ki, bu vəsaitin hazırlanması Prezident İlham Əliyevin “Azərbaycanda 2021-ci ilin “Nizami Gəncəvi İli” elan edilməsi haqqında” Sərəncamına əsasən həyata keçirilib. Kitabda AMEA-nın elmi kitabxanaları üçün şairin irsinin kitabxanalarda təbliği ilə bağlı tövsiyələr verilib. Buraya müxtəlif kitabxana tədbirləri formaları, kitab müzakirələri, müsabiqələr, ədəbi bədii gecələr, telekonfranslar və s. eyni zamanda da şairin Əlyazmalar İnstitutunda saxlanılan əlyazmaları haqqında məlumatlar var. Bundan əlavə həm də nəşrdə şairin Xəmsəsinin Türkiyədə Topqapı Saray Muzeyi Kitabxanasında, Türkiyə Süleymaniyyə Əlyazmalar Kitabxanasında, Berlində və başqa ölkələrin kitabxanalarında saxlanılan əlyazmaları haqqında məlumat daxildir”.
S.Məmmədova sözügedən metodik vəsaitin şair haqqında olan digər araşdırma kitablardan fərqli cəhətini də açıqladı: “Qeyd edim ki, bu metodik vəsaiti N.Gəncəvi haqqında hazırlanmış digər metodik vəsaitlərdən fərqləndirən cəhət odur ki, kitabda Azərbaycanda və dünyada Nizaminin araşdırmaçıları, tədqiqatçıları, nizamişünaslar haqqında məlumat da yer alır”.
Qeyd edək ki, nəşrin elmi redaktoru MEK-in baş direktoru, Prof. Məmməd Əliyev, tərtib edəni Səyyarə Məmmədova, rəyçilər filologiya üzrə fəlsəfə doktoru Zəhra Allahverdiyeva, filologiya üzrə fəlsəfə doktoru Nigar İsmayılova, ixtisas redaktoru isə Əməkdar mədəniyyət işçisi Xuraman İsmayılovadır.
