Dr. Yücel Karauz: Yeni kabinetin də sırf sahəsinin ustası olan şəxslərdən təşkil olunduğunu deyə bilərik
BAYRAQDAR MEDİA – “Məlum olduğu kimi Türkiyəni, Türkiyə yüz ilini istiqamətləndirəcək və idarə edəcək, yeni strateji baxışa malik Nazirlər Kabineti iyunun 3-də sayın Cümhurbaşqanı Recep Tayyip Erdoğan tərəfindən açıqlandı. Bu kabinetin üzvlərinə baxarkən biz yeni kabinetin də sırf sahəsinin ustası olan şəxslərdən təşkil olunduğunu deyə bilərik”.
Bunu Türkiyə Nazirlər Kabinetinin yeni tərkibini BAYRAQDAR MEDİA-ya özəl olaraq dəyərləndirən Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauz deyib.
O, qeyd edib ki, istər xarici və daxili siyasət, istərsə də enerji və iqtisadiyyat sahələrinə nəzər yetirəndə yeni kabineti “peşəkar mütəxəssislər komandası” kimi dəyərləndirmək olar: “Sayın Cümhurbaşqanı Türkiyənin yeni yüz ilə qədəm qoyduğunu bəyan etdi. Yeni kabinetin tərkibi elan edildi. Mən bunu Türkiyənin yeni yüz il hədəflərinə nail olmaq üçün ilk addım atacaq peşəkar komanda kimi dəyərləndirirəm. Hər bir nazirliyə təyin olunan şəxsin keçmişinə, fəaliyyətinə, onların rəhbərliyi ilə əldə edilən uğurlara nəzər salmaq bunun belə olduğunu deməyə əsas verir. Bir sözlə, yeni kabineti “peşəkar mütəxəssislər komandası” kimi dəyərləndirmək olar. Əminəm ki, Türkiyə bu komanda ilə yeni möhtəşəm uğurlara imza atacaq”.
Dr. Y.Karauz deyib ki, yeni kabinet Türkiyə-Azərbaycan əlaqələrinin daha da inkişafı üçün də mühüm addımlar atacaq: “Bu yeni kabinet Türkiyə-Azərbaycan əlaqələrini hərbi, xarici siyasət, iqtisadi əlaqələr, enerji təhlükəsizliyi, bir sözlə, bütün sahələrdə daha da inkişafı üçün çalışacaq. İyunun 3-də Beştepedəki mərasimdə sərgilənən mənzərə Türkiyənin regional bir güc olduğunu, qlobal proseslərə təsir edəcək bir potensiala malik olduğunu dostlara da, düşmənlərə də bir daha nümayiş etdirdi. O mərasimə qatılanların cənab Prezident İlham Əliyeva və Mehriban xanıma göstərdiyi diqqət və qayğı da bütün dünyaya bir mesaj oldu”.
