Dr. Yücel Karauz: “Tayfun” Türkiyə ordusunun gücünə güc qatacaq
BAYRAQDAR MEDIA – “Türkiyə mayın 23-də ilk milli ballistik raketin – “Tayfun”un ikinci test atışını uğurla reallaşdırdı. Bu, bütün mənalarda önəmli və tarixi addımdır. Çünki bu vaxta qədər Türkiyə qısamənzilli ballistik raketə malik deyildi”.
Bunu BAYRAQDAR MEDİA-ya özəl açıqlamasında Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauz deyib.
Xatırladaq ki, ikinci test atışı ilə bağlı Türkiyənin müdafiə sənayesi naziri İsmail Demir Twitter səhifəsində paylaşım edib. O, raketin yeni test atışının uğurla reallaşdırıldığını bildirib.
Türkiyə mediası isə raketin yerli vaxtla saat 06:44-də Qara dəniz sahilindəki Rize-Artvin hava limanı rayonundan buraxıldığı barədə məlumat yayıb.
Dr. Y.Karauz qeyd edib ki, ballistik raketlər qurudan və dənizdən rəqiblərin hədəflərinə qarşı atılan raket sistemləridir: “Ballistik raketlər atıldıqdan sonra atmosferdən çıxar, sonra təkrar atmosferə daxil olub, hədəfi vururlar. Bu xüsusiyyətlərinə görə də antiballistik raketlər və ya digər sistemlər tərəfindən vurulması çətindir”.
Dr. Y.Karauz bildirib ki, Roketsan kompaniyası tərəfindən hazırlanan “Tayfun” raketinin ilk sınaqları da 2022-ci ilin oktyabrında, Qara dəniz üzərində yenə də Rizə-Artvin hava limanında gerçəkləşdirilmişdi. Qeyd olunub ki, “Tayfun” raketinin uçuş məsafəsi 561kilometrdir: “Türkiyə Cümhurbaşqanı Recep Tayyip Erdoğan bir müddət əvvəl bildirmişdi ki, raketin uçuş məsafəsinin 1000 kilometrə çatdırılması planlaşdırılır. Eyni zamanda, ikinci sınaqda raketin uçuş məsafəsinin artırıldığını, təhlükəsizlik baxımından bunun hələ bəyan edilmədiyini düşünürəm. Onu da bildirim ki, raketin yaxın vaxtlarda Türkiyə ordusunun arsenalına daxil olması gözlənilir”. Dr. Y.Karauz deyib ki, “Tayfun” Türkiyə ordusunun gücünə güc qatacaq: “Çünki “Tayfun” 500 saniyədə 561 kilometr məsafədəki hədəfi məhv etmək gücündədir. Bundan başqa Roketsan “Tayfun”dan öncə “Bora” taktik ballistik raketini hazırlamışdı. Bundan sonra, yəni, “Tayfun”dan sonra isə Roketsan “Cenk” ballistik raketini buraxaraq 1000 kilometrdən uzaq məsafədə hədəfləri təsir altına ala biləcək. Bu isə hazırda qlobal güc olan Türkiyənin siyasi üstünlüyü ilə hərbi üstünlüyünün birləşməsinə şərait yaradacaq”.
Dr. Y.Karauz əldə edilən bu uğurun Azərbaycan baxımından da əhəmiyyətli olduğunu deyib: “Türkiyənin ordu və müdafiə sənayesində qazandığı uğurlar, əldə etdiyi nailiyyətlərdən Azərbaycana da pay düşür və bundan sonra da düşəcək. Çünki biz bir millət, iki dövlət, tək ordu, tək yumruğuq. Ona görə də bu, təkcə Türkiyənin deyil, Azərbaycanın da qürurudur. Türkiyə və Azərbaycan əleyhinə hər hansı addım atmaq istəyənlər unutmasınlar ki, Türkiyə müdafiə sənayesinin “Tayfun” da daxil son vaxtlar istehsal etdiyi hərbi məhsullar eyni zamanda lazım olduğu anda Azərbaycanın ixtiyarna veriləcək. O qüvvələr bilsinlər ki, çirkin niyyətlərindən əl çəkməsələr bir gün dəmir yumruq başlarına dəyəcək”.
TAYFUN füzemizin yeni test atışını başarılı şekilde gerçekleştirdik. 🇹🇷🚀
Başta @roketsan olmak üzere emeği geçen herkesi tebrik ediyorum.👏🏻 pic.twitter.com/n5GYavmCwH
— İsmail Demir (@profismaildemir) May 23, 2023
