Son yeniləmə: 19 May 2023 10:00
Elnur Eltürk: “Vikipediya qaydaları çərçivəsində tərtib edilən məqalələr oxucular tərəfindən platformaya etibarlılıq yaradır”
BAYRAQDAR MEDİA – Xəbər verdiyimiz kimi, “Böyük Qayıdış” Gənclər Təşkilatı tərəfindən Azərbaycan Milli Elmlər Akademiyası (AMEA) Rəyasət Heyəti aparatının “Elektron Akademiya” şöbəsinin dəstəyi ilə AMEA Mərkəzi Elmi Kitabxanasında “Viki-mən 2” layihəsinə başlanılıb.
Həm layihə, həm də ümumi Vikipediya fəaliyyəti haqqında AMEA Rəyasət Heyəti aparatının “Elektron Akademiya” şöbəsinin baş mütəxəssisi, araşdırmaçı ekspert Elnur Eltürk BAYRAQDAR MEDİA-ya açıqlama verib: “Bildirim ki, bu layihə ölkədə Vikipediya fəaliyyətinin genişlənməsinə hesablanıb. Layihə vətənpərvər, ağıllı gənclərin koordinasiya olunmuş şəkildə bu platformada fəallığını artıracaq. Bilirsiniz ki, Vikipediya açıq ensiklopediyadır. Hər kəs bu platformada fəaliyyət göstərə bilər. Ən əsası burada məqalə yaratmağın və redaktə etməyin qaydalarını yaxşı şəkildə mənimsəmək lazımdır. Buna görə də təlim boyu təlimçilərin dediklərinə diqqət etmək əsas şərtdir. Bu gün gənclər bu platformada fəaliyyət göstərməyə maraq göstərirlər. Keçirilən görüşlər və təlimlər də bunu sübut edir. “Böyük Qayıdış” Gənclər Təşkilatı keçən il belə layihəyə start verdi. Deyərdim ki, ən uğurlu layihə oldu. Layihədə iştirak edən onlarla gənc Vikipediyada çoxsaylı məqalələr yaratdılar. Məqalələr müxtəlif mövzuları əhatə edirdi və ən əsası səliqəli, keyfiyyətli, məzmunlu şəkildə hazırlanırdı. Bu, bizim üçün vacibdir”.
Ekspert xarici dil bilməyin, həmçinin etibarlı mənbələrlə düzgün işləməyin Vikipediyada geniş fəaliyyətə kömək etdiyini də bildirdi: ”Bir fikri qeyd edim ki, Vikipediya bizə nəinki öz doğma dilimizdə məqalələr yaratmağa imkan verir, eyni zamanda müxtəlif dil bölmələrində fəaliyyət üçün geniş şərait yaradır, həm də virtual platformada xalqımızın dəyərlərini, mədəniyyətini, tarixini tanıtmağa yol açır. Bundan yaralanmaq üçün gənclərimiz bu platformada fəal olmalıdılar. Bunun üçün onlar xarici dilləri yaxşı bilməklə yanaşı, eyni zamanda etibarlı mənbələrlə düzgün işləməyi də bacarmalıdırlar”.
E.Eltürk eləcə də qeyd edib ki, Vikipediyada qaydalar çərçivəsində tərtib edilən məqalələr oxucular tərəfindən də platformaya etibarlılıq yaradır.
