BAYRAQDAR MEDİA – İctimai Televiziya Ümummilli lider Heydər Əliyevə həsr olunmuş “Qrossmeyster” sənədli filminin nümayişinə başlayıb.
Bu haqda xəbər BAYRAQDAR MEDİA-ya mayın 9-da İTV-dən daxil olub.
Xəbərdə deyilir ki, “İTV Ulu öndər Heydər Əliyevin 100 illiyinə həsr olunmuş 3 seriyalı film hazırlayıb. “Qrossmeyster” adlı sənədli filmin I hissəsi “Debüt”, II hissə “Mittelşpil”, III hissəsi “Endşpil” adlanır. Heydər Əliyevin Azərbaycan tarixində oynadığı mühüm roldan, həyata keçirdiyi genişmiqyaslı işlərdən, layihələrdən bəhs olunan filmin I hissəsində Ulu öndərin Sovet Azərbaycanına rəhbərliyi dövründə cərəyan edən mühüm hadisələr əks olunur. Eyni zamanda, tarixə ekskurs edilərək, ermənilərin Qarabağı Azərbaycandan qoparmaq cəhdlərinin qarşısının Heydər Əliyev tərəfindən necə alınması, Azərbaycan ziyalı təbəqəsinin repressiyalardan necə qorunması göstərilir. Həmçinin, Heydər Əliyevin keçmiş SSRİ rəhbərliyi ilə münasibətlərindən, ölkəmizin sənayeləşməsi, inkişaf etdirilməsi istiqamətində atdığı mühüm addımlardan bəhs edilir”, – deyə xəbərdə bildirilir.
Daha sonra qeyd edilir ki, “filmin II hissəsi Heydər Əliyevin SSRİ rəhbərliyində təmsil olunduğu dövrü əhatə edir. Həmin dövrdə Ulu öndərin Azərbaycan üçün gördüyü işlərdən, Ümumittifaq miqyaslı layihələrdə, Baykal-Amur Magistralının tikintisində rolundan, İttifaq dövlətlərinin, xaricdəki sosialist respublikaların inkişafına verdiyi töhfələrdən bəhs olunur. Eyni zamanda, Heydər Əliyev və Mixail Qorbaçov arasında münasibətlərdən, Sovet İttifaqının dağılması prosesindən danışılır”.
“Filmin III hissəsi isə Azərbaycanın müstəqilliyinin bərpası dövrünə aiddir ki, burada Heydər Əliyevin Moskvadan Naxçıvana qayıdışı, onun qətiyyətli siyasi fəaliyyəti, üzləşdiyi çətinliklər, erməni təcavüzünün qarşısının alınması və Respublikaya rəhbərlik etməyə başlaması reallıqlarından bəhs edilir.
“Filmdə Heydər Əliyevin siyasi fəaliyyəti ilə şahmat partiyası arasında analogiya aparılır. Qeyd olunur ki, bütün bunlar Ulu öndərin böyük bir şahmat partiyası idi.
“Dahi şəxsiyyət Heydər Əliyev sonradan həyatda olmasa da onun siyasi varisi, Prezident İlham Əliyev bu şahmat partiyasını qalibiyyətlə başa vurdu.
“Qeyd edək ki, “Qrossmeyster” sənədli filminin ilk hissəsi mayın 8-də artıq nümayiş etdirilib. Mayın 9-da filmin II hissəsi saat 20:40-da, mayın 10-da isə I və II seriyaların təkrarı saat 18:35-də, III hissə isə saat 20:35-də İTV efirində nümayiş etdiriləcək.” Xəbərdə belə deyilir.
