BAYRAQDAR MEDİA – Mayın 7-də Üzeyir Hacıbəyli adına Bakı Musiqi Akademiyasının Opera Studiyasında Azərbaycanın sevilən aktyoru, Xalq artisti, Azərbaycan Kinematoqrafçılar İttifaqının sədri Rasim Balayevin yaradıcılıq axşamı təşkil olunub.
Görüşdə aktyorun sənət yoldaşları, dostları, ailə üzvləri, onu sevənlər iştirak edib. Görüş zamanı Xalq artisti özünün keçdiyi ömür yolu, kinoya gəlişi, fəaliyyəti, kino çəkilişləri zamanı başına gələn hadisələr və s. haqqında onu sevənlərə geniş məlumat verib. Tamaşaçılar isə öz növbəsində aktyora ürək sözlərini, suallarını ünvanlayıblar. Şən əhvalda keçən görüşdə aktyor onu sevənlərin suallarını cavablandırıb. O, həmçinin tamaşaçılar üçün Nəsiminin qəzəlini də səsləndirib.
Bildirək ki, görüş zamanı səhnəni Xalq artisti ilə onun dostu, Əməkdar artist Elxan Qasımov bölüşüb. E.Qasımov da öz növbəsində R.Balayev ilə tanışlıqları, kino çəkilişlərində olmuş maraqlı xatirələri tamaşaçılarla bölüşüb.
Görüş əsnasında R.Balayevi sevənlər ona müxtəlif hədiyyələr, gül dəstələri təqdim edib, həmçinin aktyor ilə xatirə fotosu çəkdiriblər.
Qeyd edək ki, görüşdə Xalq artistinin çəkildiyi filmlərdən fraqmentlər nümayiş olunub.
