BAYRAQDAR MEDİA – Güney Azərbaycanlı ictimai fəal, insan haqları müdafiəçisi və jurnalist Nərgiz Məhəmmədi daha iki iranlı jurnalist xanımla birlikdə UNESCO-nun ildə bir dəfə verilən nüfuzlu mükafatına layiq görülüb.
Bu haqda xəbəri mayın 3-də UNESCO yayıb.
Qeyd edək ki, 3 may dünyada Mətbuat Azadlığı Günü kimi qeyd edilir. Bu gün münasibətilə bir çox qurumlar, o cümlədən UNESCO geniş tədbirlər keçirir, basqı altında olan media qurumlarına və jurnalistlərə diqqət çəkir.
UNESCO qeyd edib ki, Guillermo Kano (UNESCO/Guillermo Cano World Press Freedom Prize) Mükafatına Nilufər Həmidi, İlahə Mohəmmədi və Nərgiz Məhəmmədi adlı üç iranlı jurnalist xanım layiq görülüb.
Nilufər Həmidi bu mükafata hazırda da davam edən İran ayaqlanmalarına səbəb olan əsas hadisəni – Məhsa Əmininin ölümünü ictimailəşdirdiyinə və bu üzdən həbs edildiyinə görə layiq görülüb.
İlahə Mohəmmədi də Məhsa Əmini məsələsinə görə həbs edilib. O, İran irticasının qurbanı olan gənc qızın dəfn mərasimindən yazdığı üçün həbsə atılıb.
Nərgiz Məhəmmədi isə uzun illərdir jurnalist fəaliyyəti ilə məşğul olur. O, Tehranda yerləşən Müdafiəçilər İnsan Haqları Uğrunda adlı təşkilatın direktor müavinidir. N.Məhəmmədi hazırda Tehranın Evin zindanında 16 illik həbs cəzası çəkir. O, burada da boş durmur, imkan olduqca qadın məhbuslarla müsahibələr edir. Onun belə müsahibələri “Ağ işgəncə” adlı kitabında dərc edilib. Nərgiz Məhəmmədi 2022-ci ildə Sərhədsiz Reportyorlar Təşkilatının “Cəsarət” ödülünə də layiq görülüb.
Qeyd edək ki, Guillermo Cano Mükafatı 1997-ci ildə təsis edilib və əsasən mətbuat azadlığına ciddi töhfə verən şəxslərə və ya qurumlara verilir.
Mükafat öz adını 17 dekabr 1986-cı ildə Kolumbiyanın paytaxtı Bogotada “El Espectador” qəzeti redaksiyasının önündə öldürülmüş jurnalist Guillermo Cano İsazanın adından götürüb.
Fars-molla rejimi Güney Azərbaycanlı xanıma basqıları artırıb
