Son yeniləmə: 1 May 2023 16:00
Dos. Dr. Oğuz Göksu: Bu gün dezinformasiya və qara təbliğat türk dünyasının üzləşdiyi ortaq problemdir
BAYARQDAR MEDİA – “Təəssüflə də olsa qeyd etməliyik ki, bu gün dezinformasiya və qara təbliğat türk dünyasının üzləşdiyi ortaq problemdir. Yəni, hazırda dezinformasiya sadəcə Azərbaycan və Türkiyə üçün deyil, bütün türk dövlətləri üçün əsas problemlərdən biridir. Buna qarşı da ancaq birlikdə mübarizə aparsaq nəticə əldə edə bilərik”.
Bunu BAYRAQDAR MEDİA-ya özəl müsahibəsində Türkiyə Cumhurbaşkanlığı İletişim Başkanlığı Basın ve Yayın Dairesi Başkanı, TRT Yönetim Kurulu üyesi Dos. Dr. Oğuz Göksu bildirib. Xatırladaq ki, maraqlı fikirlərlə zəngin müsahibəni yaxın günlərdə oxucularımıza təqdim edəcəyik.
Dos. Dr. Oğuz Göksu dezinformasiya ilə birgə mübarizənin nümunəsinin də olduğunu bildirib: “Bu gün bir həqiqət gün kimi aydındır. Cəbhədəki müharibə media və informasiya sahəsində də eyni qətiyyətlə aparılmalıdır. 2021-ci ildə keçirilən Türk Dövlətləri Təşkilatı Media Konseyindəki çıxışında iletişim başkanımız Fahrettin Altun da vurğuladı ki, 44 günlük müharibə eyni zamanda informasiya və media savaşı idi. Azərbaycan və Türkiyə burada da bir qardaşlıq nümunəsi göstərdi. Biz qardaşlarımızın haqlı davasını dünyaya çatdırmaq və həqiqəti yaymaq üçün rabitə və informasiya sahəsində var gücümüzlə çalışdıq”.
