BAYRAQDAR MEDİA – Aprelin 29-da Azərbaycan Dövlət Akademik Musiqili Teatrında “Anamın kitabı” tamaşası ingilis dilində nümayiş olundu.
Teatrın mətbuat katibi Fəridə Aslanova tamaşa haqqında BAYRAQDAR MEDİA-ya məlumat verdi: “Onu söyləyə bilərəm ki, Mədəniyyət Nazirliyinin layihəsi çərçivəsində səhnəyə vəsiqə qazanan bu tamaşa Azərbaycan dramaturgiyasının klassik nümunələrindən biri olan Cəlil Məmmədquluzadənin “Anamın kitabı” əsəri əsasında hazırlanıb. Tamaşanın quruluşçu rejissoru İradə Gözəlova, tərcümə edəni Tərlan Rəsulov, quruluşçu rəssamı Vüsal Rəhim, videomühəndisi Murad Həsənovdur. Döyüş səhnələrinin və rəqslərin quruluşu Xalq artisti Pərviz Məmmədrzayev və rejissor Zaur Əliyevə aiddir. Qeyd edim ki, səhnə əsəri tamaşaçıların böyük marağına səbəb oldu”.
Bildirək ki, tamaşada Teatrın sevilən aktyorları Səmədzadə Xasiyev, Hüseyn Əlili, Zaur Əliyev, Əli Kərimov, teatrın tərcüməçisi Şamxal Nəsibbəyli, balet artisti İranə Kərimova, digər teatrların gənc aktyorları Səmayə Qulamzadə, Nurlan Süleymanlı, Türkan Şahmarlı, Aygün Fətullayeva, Lalə Süleymanova iştirak etdilər.
