Son yeniləmə: 26 Aprel 2023 14:32
Vüqar İskəndərov: Ölkəmiz Avropanın əhəmiyyətli və etibarlı enerji tərəfdaşı kimi özünü təsdiq edib
BAYRAQDAR MEDİA – “44 günlük Vətən müharibəsində tarixi zəfər əldə edən Azərbaycan hazırda həm daxili, həm də xarici siyasətdə yeni-yeni uğurlar əldə edir. Bu uğurların da əsasında Prezident İlham Əliyevin rəhbərliyi ilə həyata keçirilən qətiyyətli, düşünülmüş və milli maraqlara əsaslanan siyasət dayanır”.
Bunu BAYRAQDAR MEDİA-ya özəl açıqlamasında Milli Məclisin deputatı Vüqar İskəndərov deyib.
Deputat bildirib ki, Azərbaycan bu gün həm də Avropanın enerji mənbələrinin diversifikasiyasında və enerji təhlükəsizliyinin təmin olunmasında mühüm rol oynayır: “Avropanın enerji təhlükəsizliyinin təmini istiqamətində atılan mühüm addımların, imzalanan müqavilələrin mərkəzində məhz Azərbaycan dayanır. Elə aprelin 25-də Bolqarıstan, Rumıniya, Macarıstan, Slovakiyanın ötürücü sistem operatorları və SOCAR arasında Anlaşma Memorandumunun imzalanması da bunun növbəti sübutudur”.
V.İskəndərovun sözlərinə görə, həmin mərasimdə Azərbaycanla bağlı səslənən fikirlər hər bir azərbaycanlıda qürur yaradır: “İstər Avropa İttifaqının energetika məsələləri üzrə komissarı xanım Kadri Simsonun videomüraciətinin, istərsə də ayrı-ayrı ölkələrinin rəsmilıərinin çıxışlarının ana xəttini iki məqam təşkil edirdi. Birincisi, yuxarıda da qeyd etdiyimiz kimi, Azərbaycan Avropanın enerji mənbələrinin diversifikasiyasında və enerji təhlükəsizliyinin təmin olunmasında mühüm rol oynayır. İkincisi isə, Azərbaycan etibarlı tərəfdaş kimi də Avropada yüksək nüfuza malikdir. Məsələn, Avropa İttifaqının enerji məsələləri üzrə komissarı Kadri Simson deyib ki, “Azərbaycan həm etibarlı tərəfdaş, həm də böyük qaz potensialına malik olan ölkədir”. Bolqarıstan Prezidenti Rumen Radev isə “Azərbaycan hər zaman etibarlı tərəfdaş kimi çıxış edib və üzərinə götürdüyü öhtəlikləri daim yerinə yetirib” deyə vurğulayıb. Bütün bunlar, yəni imzalanma mərasimində səsləndirilmiş fikirlər bir daha göstərdi ki, Azərbaycan Avropanın əhəmiyyətli və etibarlı enerji tərəfdaşı kimi özünü təsdiq edib. Eyni zamanda, Avropanın enerji bazarında Azərbaycan qazına tələbat durmadan artır”.
