Son yeniləmə: 25 Aprel 2023 14:37
Azərbaycan Diasporuna Dəstək Fondu və TADEF Kahramanmaraşda zəlzələdən zərər çəkənlərə yardım edib
BAYRAQDAR MEDİA – Diasporla İş üzrə Dövlət Komitəsinin tabeliyində fəaliyyət göstərən Azərbaycan Diasporuna Dəstək Fondu Türkiyə Azərbaycan Dərnəkləri Federasiyası (TADEF) ilə birlikdə Kahramanmaraş şəhərində zəlzələdən zərər çəkənlərə yardım kampaniyası təşkil edib.
Bu barədə BAYRAQDAR MEDİA-ya aprelin 25-də komitədən məlumat verilib.
Bildirilib ki, yardım kampaniyası Azərbaycan Prezidenti İlham Əliyevin tapşırığına uyğun olaraq Türkiyədə baş vermiş güclü zəlzələnin fəsadlarının aradan qaldırılması, zəlzələdən zərər çəkənlərin həyatlarının yüngülləşdirilməsi, ehtiyaclarının ödənilməsi məqsədilə dövlətimizin həyata keçirdiyi uzunmüddətli kampaniyanın tərkib hissəsidir: “Kahramanmaraş valisi Ömər Faruk Coşkun, Kahramanmaraş Böyük Şəhər Bələdiyyəsinin sədri Hayrettin Güngör Azərbaycandan gələn qonaqlarla və diaspor nümayəndələri ilə görüşüblər. Görüşlərdə Diasporla İş üzrə Dövlət Komitəsinin, Azərbaycan Diasporuna Dəstək Fondunun, TADEF-in və Türkiyədəki Azərbaycan diasporunun təmsilçiləri iştirak ediblər. Görüşlərdə kampaniyanın səmərəli təşkili müzakirə olunub, Azərbaycan dövlətinin, həmçinin diaspor təşkilatlarının hər zaman türkiyəli qardaşlarımızın yanında olduqları, müvafiq addımlar atmağa hazır olduqları diqqətə çatdırılıb”.
O da bildirilib ki, 2 min 600-dən çox ailəyə çatdırılan yardım bağlamalarında 30 çeşiddə gündəlik tələbat malları var: “TADEF-in təşklatçılığı ilə İstanbuldan Kahramanmaraşa yola düşən maşınlar artıq ünvana çatıb və yardım zəlzələdən zərər çəkənlərə çatdırılır. Qeyd edək ki, yardım kampaniyası xaricdə yaşayan aztəminatlı azərbaycanlılara, o cümlədən Türkiyədə baş vermiş zəlzələdən zərər çəkmiş şəxslərə sosial yardım göstərilməsi üçün ayrılan dövlət vəsaiti və bir müddət əvvəl ADDF tərəfindən həyata keçirilmiş “Türkiyə, səninləyik!” yardımtoplama kampaniyası çərçivəsində toplanmış ianələr hesabına həyata keçirilir. Kampaniya iki gün davam edəcək”.
