BAYRAQDAR MEDİA – AMEA Mərkəzi Elmi Kitabxanasındakı nəşrlər arasında pedaqoji elmlər namizədi, Dos. Sabir Əmirxanov və Prof. İlqar Hüseynovun müəllifi olduqları “Dünya muzeyləri və tarixi mədəniyyət abidələri” adlı kitab da var.
Dərs vəsaiti kimi təqdim olunan kitabda İtaliya, İngiltərə, Fransa, Macarıstan, ABŞ, Hollandiya, Belçika, İsveçrə, Rusiya, Almaniya, Azərbaycan və digər ölkələrdə məşhur muzeylərin, tarixi mədəniyyət abidələrinin yaranması, inkişafı, ayrı-ayrı sənətkarların müxtəlif dövrlərdəki yaradıcılıq nümunələrindən bəhs edilir.
Kitabın girişində Hüseyn Cavidin,
“Turana qılıncdan daha kəskin ulu qüvvət,
Yalnız mədəniyyət, mədəniyyət, mədəniyyət!” sözləri verilib.
Nəşrdə haqqında bəhs edilən abidələr sırasında İtaliyada Milli Qalereya, Venesiya bədii muzeyləri, Almaniyada Drezden Qalereyası, Berlin muzeyləri, Hollandiyada Amsterdam reyksmuzeumu, Budapeştdə Macarıstan Milli Qalereyası, Budapeşt Tarixi Muzeyi, həmçinin Azərbaycanda yerləşən Azərbaycan Tarixi Muzeyi, R.Mustafayev adına Azərbaycan Dövlət İncəsənət Muzeyi, L.Kərimov adına Azərbaycan Xalçası və Xalq Tətbiqi Sənəti Dövlət Muzeyi, N.Gəncəvi adına Azərbaycan Ədəbiyyatı Muzeyi, C.Cabbarlı adına Azərbaycan Dövlət Teatr Muzeyi, Azərbaycan Dövlət Musiqi Mədəniyyəti Muzeyi və s. var.
Eləcə də “Avropada müasir tipli muzeylərin yaranması və inkişafının obyektiv amilləri”, “Azərbaycan sənətkarlığı nümunələri Fransada”, “Almaniyada Azərbaycan sənətkarlığı nümunələri”, “Böyük Britaniyada Azərbaycan sənətkarlığı nümunələri”, “İsveçdə Azərbaycan sənətkarlığı nümunələri”, “Budapeşt muzeylərində Azərbaycan sənətkarlığı nümunələri” və s. başlıqlı yazılara da yer verilib.
Qeyd edək ki, nəşrin elmi redaktoru Əməkdar incəsənət xadimi, Prof. Arif Əzizov, redaktoru Dos. Mübariz Süleymanov, rəyçilər Xalq rəssamı, akademik Mikayıl Abdullayev, Prof. Şəhrəddin Məmmədov, Prof. Solmina Dadaşova və Prof. Ramiz Ağayevdir.
