Dr. Yücel Karauz: Türkiyəyə barmaq silkələməyə çalışanlar, Türkiyəni proseslərdən kənarda qoymaq istəyənlər daha dərindən düşünməlidirlər
BAYRAQDAR MEDİA – “Ölkələr yerləşdikləri coğrafiyaya görə silahlı qüvvələrini dizayn edərlər. Türkiyə də quru, dəniz və hava sərhədləri olduğu üçün hər üç sahədə güclü olmaq məcburiyyətindədir. Bu baxımdan TCG Anadolu gəmisinin mühüm əhəmiyyəti var”.
Bunu BAYRAQDAR MEDİA-ya özəl açıqlamasında Türkiyənin Azərbaycandakı sabiq hərbi attaşesi, ehtiyatda olan general Dr. Yücel Karauz deyib.
Türkiyə bölgəsindəki və dünyadakı qlobal proseslərə təsir edə biləcək bir mövqeyə gəlib
O, qeyd edib ki, hazırda regional güc olan Türkiyə qlobal güc olmağa doğru addım-addım irəliləyir: “Bu da təbii ki, həyata keçirilən uğurlu xarici siyasətlə yanaşı, müdafiə sənayəsində də əldə edilən misilsiz uğurlarla bağlıdır. Müdafiə sənayesinin milli güc ünsürləri ilə birləşməsi nəticəsində Türkiyə bölgəsindəki və dünyadakı qlobal proseslərə təsir edə biləcək bir mövqeyə gəlib. Buna Rusiya-Ukrayna müharibəsi, Liviyadakı hadisələr, yaxud da Somalidəki proseslər nümunə göstərilə bilər”.
Dr. Y.Karauz deyib ki, Türkiyənin ən böyük hərbi gəmisi mühüm üstünlüklər vəd edir: “Sayın Cümhurbaşqanının da dediyi kimi biz bu gəmini Türkiyə yüz ilində öz regionunda lider və dünyada söz sahibi mövqeyimizi möhkəmləndirəcək bir simvol olaraq görürük. Çünki 16 min kilometrə məsafəni üzmək imkanına malik TCG Anadolu öz sahəsində dünyanın ilk döyüş gəmisidir. Burada ən böyük və ən ağır helikopterlər və pilotsuz uçuş aparatları enib qalxır. Yəni TCG Anadolu dünyanın ilk SİHA gəmisidir. Bayraktar TB3 SİHA, Kızılelma İnsansız Qırıcı və Hürjet Yüngül Hücum təyyarələri bu gəmiyə enib qalxa biləcək. Bundan əlavə, bu gəmi daşıdığı tanklar və zirehli amfibiya hücum maşınları sayəsində lazım gəldikdə dünyanın hər yerində hərbi və humanitar əməliyyatlar keçirməyimizə imkan verəcək xüsusiyyətlərə malikdir”.
TCG Anadolu böyük bir hərəkət, hərbi manevr imkanlarına malikdir
Qeyd edilib ki, TCG Anadolu sayəsində Türkiyə əsas dəstəyə ehtiyac olmadan Egey, Aralıq dənizi, Qırmızı dənizdə və Qara dənizlərdəki böhran bölgələrinə batalyon böyüklüyündə bir qüvvə köçürə biləcək: “Silah sistemləri, döyüş idarəetmə sistemi, elektron döyüş sistemləri, infraqırmızı axtarış və izləmə sistemi, lazer xəbərdarlıq sistemi, torpedadan müdafiə sistemi, gəmidəki radarlar yerli və milli sənayemiz tərəfindən hazırlanmış gəmi böyük bir hərəkət, hərbi manevr imkanlarına malikdir. Hərbi məqsədlərlə yanaşı, təbii fəlakətdən xilasetmə missiyaları və lazım gəldikdə humanitar əməliyyatlar üçün istifadə edə biləcəyimiz bu gəmidə tam təchiz olunmuş xəstəxana və əməliyyat otağı da var. Bütün bu xüsusiyyətləri ilə TCG Anadolu sayəsində biz dünyada ilklərdən biri olan və oyun dəyişdirən texnologiyaları, sistemləri və həlləri təqdim edən bir ölkə olacağıq”.
Bu, başda Azərbaycan olmaqla Türkiyənin dostları üçün də böyük bir strateji imkandır
Müsahibimiz, həmçinin, “Təbii ki, bütün bunlar sıradan bir məsələ deyil. Yəni, təkcə Türkiyə dənizlərində deyil, Türkiyənin xaricindəki dənizlərdə də təsir göstərə biləcəyi üçün Türkiyəyə barmaq silkələməyə çalışanlar, Türkiyəni proseslərdən kənarda qoymaq istəyənılər daha dərindən düşünməlidirlər. Digər tərəfdən bu təkcə Türkiyə üçün deyil, başda Azərbaycan olmaqla Türkiyənin dostları üçün də böyük bir strateji imkandır. Azərbaycanın ərazi bütövlüyünə qəsd etmək istəyənlər, mövcud statusla barışmayanlar və hər gün yayımladıqları video və pozucu fəaliyyətlərlə barmaq silkələməyə çalışanlar da artıq ayaqlarını denk almalıdırlar” deyib.
