BAYRAQDAR MEDİA – AMEA Mərkəzi Elmi Kitabxanasındakı qiymətli nəşrlər sırasında müəllifi Əməkdar incəsənət xadimi Aydın Talıbzadə olan “Min maska və bir mən” (yaxud islam mədəniyyətinin semiolojisi) kitabı da yer alır.
Nəşr kulturoloji, etnoqrafik, elmi-nəzəri məqalələr, fəlsəfi esselər toplusudur, islam mədəniyyətinə, dünyaya, sənətə maraqlı yanaşma yönüdür, düşüncə spektridir.
Maska və niqab müqayisə edilərək kitabda belə qeyd olunur: “Maska üz əvəzinə ölü üzdür, qansız üzdür, soyuq üzdür. Maska ruhun sərdabəsidir. Niqabsa qeyri-adi, misli görünməmiş, tayı-bərabəri olmayan bir üzə işarədir. Maska yeraltı dünya, ölülər səltənəti ilə ilişiklidir. Bunun qənşərində isə niqab yalnız yuxarı, ilahi, sakral dünyaya eyhamdır. Maska aldadır, yayındırır, üzün həqiqətini ört-basdır edir. Niqabsa üzün əsl mahiyyətini açıqlayır, bildirir ki, örtük (pərdə) arxasında fenomenal insanın şəxsiyyəti məskunlaşıb. Maska və niqabın hər ikisinin funksiyasında (yasaq etmək, qorumaq, gizlətmək və şəxsiyyətə çevirmək) qohumluq əlaqəsi aşkarlansa da məna bildirmək, məna aydınlatmaq baxımından onlar bir-birlərinə həmişə qarşıdurma təşkil edirlər. Maska qaranlıq, niqab işıqlı dünya ilə bağlıdır”.
Kitabda həmçinin “Kütlə: teatr və kino”, “Bədən və ruh kulturoloji problem kimi”, “Müsəlmanların məscid və bazarı”, “Psixoloji məkan fenomeni: yuxarı və aşağı”, “Bağ teatral məkan kimi”, “Tənqidin fenomenologiyası”, “Şərq və Qərb dixotomiyası maarifçilik kontekstində” və s. kimi başlıqlara yer verilib.
