Son yeniləmə: 13 Aprel 2023 13:34
Səfər çərçivəsində Səudiyyə Ərəbistanı-Azərbaycan Birgə İşgüzar Şurasının ilk iclası keçirilib
BAYRAQDAR MEDİA – Azərbaycanda biznesə dəstək göstərən qurumların nümayəndələri, eləcə də turizm, kənd təsərrüfatı, sənaye, tikinti, investisiya, nəqliyyat, konsaltinq və s. sektorlarda fəaliyyət göstərən iş adamları Səudiyyə Ərəbistanında səfərdədir.
Bu barədə BAYRAQDAR MEDİA-ya aprelin 13-də Kiçik və Orta Biznesin İnkişafı Agentliyindən (KOBİA) məlumat verilib.
Bildirilib ki, KOBİA-nın təşkilatçılığı və Azərbaycanın Səudiyyə Ərəbistanındakı səfirliyinin dəstəyi ilə təşkil olunmuş səfərin məqsədi hər iki ölkənin KOB subyektləri və sahibkarlara dəstək və xidmət göstərən qurumları arasında əlaqələrin genişləndirilməsi, KOB-ların iştirakı ilə birgə biznes və investisiya layihələrinin reallaşdırılması imkanlarının və təcrübə mübadiləsinin nəzərdən keçirilməsidir.
Məlumata əsasən, səfər çərçivəsində Ər-Riyad şəhərində Səudiyyə Ərəbistanı-Azərbaycan Birgə İşgüzar Şurasının ilk iclası keçirilib: “Səudiyyə Ərəbistanının Palatalar Federasiyasının, İnvestisiya Nazirliyinin və Azərbaycan Respublikasının Kiçik və Orta Biznesin İnkişafı Agentliyinin (KOBİA) təşkilatçılığı ilə keçirilmiş iclasda hər iki ölkədən rəsmi şəxslər və iş adamları iştirak ediblər. İclasdakı çıxışlarında Səudiyyə Ərəbistanının investisiya nazirinin müavini Məhəmməd Əl Hassnah, Səudiyyə Ərəbistanı-Azərbaycan Birgə İşgüzar Şurasının həmsədrləri – Əhməd Əli Əl Dakhil və KOBİA-nın İdarə Heyətinin sədri Orxan Məmmədov, Azərbaycan Sahibkarlar (İşəgötürənlər) Təşkilatları Milli Konfederasiyasının vitse-prezidenti Vüqar Zeynalov, Azərbaycanın İxracın və İnvestisiyaların Təşviqi Agentliyinin – AZPROMO-nun icraçı direktorunun müavini Zöhrab Qədirov və İşgüzar Şuranın sədr müavini Turki Alhokair müvafiq olaraq ölkələrimizin işgüzar dairələri arasında ticarət və investisiya sahəsində əməkdaşlıq imkanları, şuranın yaradılması məqsədi, KOBİA və Azərbaycan iş adamlarından ibarət nümayəndə heyətinin Səudiyyə Ərəbistanına səfəri barədə məlumat veriblər”.
Qeyd edilib ki, tədbir çərçivəsində KOBİA və AZPROMO tərəfindən ölkəmizin biznes və investisiya imkanları, ixrac potensialı, yerli və xarici iş adamlarına göstərilən dəstək və xidmətlər, eləcə də Azərbaycan iş adamları tərəfindən biznes və ticarət sahəsində əməkdaşlıq perspektivləri barədə təqdimatlar keçirilib. Həmçinin, Səudiyyə Ərəbistanının İnvestisiya Nazirliyi və İxracın İnkişafı İdarəsi tərəfindən isə bu ölkənin investisiya potensialına, iş adamları üçün yaradılmış imkanlara və istehsal olunan məhsul və xidmətlərə dair təqdimatlar keçirilib.
Tədbirdən sonra təşkil olunmuş “B2B” görüşlərdə hər iki ölkənin KOB-ları arasında məlumat və təcrübə mübadiləsi, əməkdaşlıq imkanları, birgə tədbirlərin və görüşlərin, qarşılıqlı biznes missiyaların təşkili kimi məsələlər müzakirə edilib.
