Son yeniləmə: 12 Aprel 2023 15:40
BAYRAQDAR MEDİA – Azərbaycan Mətbuat Şurası Beynəlxalq əlaqələr komissiyasının üzvləri Kuzey Kıbrıs Türk Cümhuriyyəti (KKTC) Bakı nümayəndəliyinin rəhbəri Ufuk Turganer ilə görüşüb.
Bu haqda xəbər BAYRAQDAR MEDİA-ya aprelin 12-də MŞ-dən daxil olub.
Xəbərdə deyilir ki, “sədr Müşfiq Ələsgərli rəhbərlik etdiyi komissiyanın fəaliyyəti və qarşıdakı prioritetləri barədə məlumat verib. Komissiyanın üzvləri – Yadigar Məmmədli, Azər Həsrət və Aqil Ələsgər iki ölkənin media platformaları arasında münasibətlərin inkişaf etdirilməsinə dair fikirlərini bölüşüb. Onlar KKTC nümayəndəliyi ilə MŞ-nin əməkdaşlığının bu sahəyə verə biləcəyi töhfələr barədə söz açıblar”.
Daha sonra xəbərdə, “ziyarət üçün təşəkkürünü bildirən U.Turganer təmsil etdiyi diplomatik missiyasının media ilə münasibətlərə xüsusi diqqət yetirdiyini bildirib. O, nümayəndəliklə MŞ, həmçinin ölkənin media qurumları arasında əməkdaşlığın sağlam təməllər üzərində qurulduğunu, ümumi maraqlara uyğun olduğunu vurğulayıb. U.Turganer, eyni zamanda, əməkdaşlığın inkişafı üçün təkliflərini səsləndirib” deyə bildirilir.
Görüşdə qarşılıqlı maraq doğuran məsələlərlə əlaqədar fikir mübadiləsi aparılıb.
