BAYRAQDAR MEDİA – 2023-cü ilin “Heydər Əliyev İli” elan edilməsi haqqında Azərbaycan Prezidentinin Sərəncamının icrası ilə əlaqədar Azərbaycan Ordusunda keçirilən tədbirlər davam etdirilir.
Tədbirlər çərçivəsində Şəxsi Heyət Baş İdarəsinin İdeoloji İş və Mənəvi-Psixoloji Təminat İdarəsinin hərbi qulluqçuları və Dini Qurumlarla iş üzrə Dövlət Komitəsinin bir qrup nümayəndəsinin iştirakı ilə Azərbaycan Ordusunda milli-mənəvi dəyərlərin təbliği, şəxsi heyətə vətənpərvərlik hissinin aşılanması məqsədilə azad edilmiş ərazilərdə hərbi qulluqçularla görüşlər keçirilib.
Bu haqda xəbəri BAYRAQDAR MEDİA-ya aprelin 10-da MN-dən veriblər.
“Görüşlərdə qeyd olunub ki, Ümummilli Lider Heydər Əliyev dövlət quruculuğu siyasətində hər zaman milli-mənəvi dəyərlərimizi yüksək tutub, adət-ənənələrimizin qorunub saxlanmasında misilsiz xidmətlər göstərib. Ulu Öndərin siyasi kursunun layiqli davamçısı Azərbaycan Respublikasının Prezidenti cənab İlham Əliyevin apardığı uğurlu siyasət nəticəsində Azərbaycanın dünyada islami, bəşəri milli-mənəvi dəyərlərə önəm verən və hörmətlə yanaşan, humanist, tolerant dövlət kimi tanındığı diqqətə çatdırılıb”, – deyə xəbərdə bildirilir.
Daha sonra qeyd edilir ki, “keçirilən görüşlər zamanı şəxsi heyətlə “Dini ekstremizmlə mübarizədə hərbi qulluqçuların yeri və rolu” və digər mövzularda geniş söhbətlər aparılıb, həmçinin gənclərin hərbi vətənpərvərlik ruhunda tərbiyəsi, onların zərərli vərdişlərdən qorunmasında milli-mənəvi dəyərlərimizin rolu və bu istiqamətdə həyata keçirilən maarifləndirmə tədbirlərinin əhəmiyyəti barədə ətraflı məlumat verilib”.
Eyni zamanda hərbi qulluqçuları maraqlandıran suallar da cavablandırılıb.
