BAYRAQDAR MEDİA – AMEA Mərkəzi Elmi Kitabxanasındakı nəşrlər arasında Rəhim Museyibovun “İslam – Muğam – Füzuli (ariflərə-aqillərə xitabən)” kitabı da yer alır.
Müəllif kitabla bağlı bu sözləri deyir: “Əslində mən nə İslam, nə Muğam, nə də Füzuli fəlsəfələrini məxsusi şərh etməyə cəhd etməmişəm. Mən bu mürəkkəb-müqəddəs anlamların marağında daha çox olduğum Quran fəlsəfəsi – Təsəvvüf işığında yozumumu axtarmışam, bu aspektdən onların kəsb etdiyi ideya-məna-məzmun çalarlarını qismən açmaq arzusunda olmuşam. Məqsədim dövrün-zamanın çətin anlaşılan bu anında Milli Məfkurəmizin bilavasitə qaynaqlandığı İslam, Muğam, Füzulidən (ümumidən) keçərək özümüzü (məni) tanımaq-anlamaqdır”.
Sözügedən nəşrdə müəllifin vaxtı ilə elmi-fəlsəfi tədqiqatçısı olduğu “Füzuli yaradıcılığında sufi (təsəvvüf) motivləri və muğam sənəti. Fəlsəfi-estetik təhlil” mövzusu ətrafında yazdığı və görkəmli elm xadimləri tərəfindən rəsmən dəstəklənən elmi və bədii-publisistik məqalələri toplanıb.
Qeyd edək ki, kitabda “İslam kamil dindir”, “Muğamda inqilabmı, yoxsa islahatmı?”, “Muğam həqiqətinə dini-fəlsəfi baxış”, “Muğam və Füzuli”, “Sənətin sehri”, “Füzuli təəssübkeşliyi”, “Qarabağ dərdində Füzuli poeziyası”, “Milli məfkurə və milli teleradio yayım şurası” və s. bu mövzuda başlıqlarda yazılar yer alır.
