BAYRAQDAR MEDİA – Aprelin 1-də Amerika Birləşmiş Ştatlarının Los-Angeles şəhərində Amerika Televiziya Sənətləri və Elmləri Akademiyasının “College Awards” – Gənclər Emmisi mükafatının təqdimat mərasimi keçirilib.
Mərasimdə Real Televiziyasının proqramlaşma departamentinin, eyni zamanda Real FM-də yayımlanan “Cinema Radio” Kino Radio Kanalının rəhbəri, Azərbaycan Mədəniyyət və İncəsənət Universitetinin müəllimi, Amerika Televiziya Sənətləri və Elmləri Akademiyasının, həmçinin, sözügedən mükafatın builki münsiflər heyətinin üzvü Kamran Qasımov da iştirak edib”.
Xəbəri BAYRAQDAR MEDİA-ya aprelin 2-də K.Qasımov verib.
Kamran Qasımov mərasimdən sonra Amerika Televiziya Akademiyasının vitse-prezidenti Laurell Vitmkob, Akademiya Fondunun sədri Kris Abrego, Akademiyanın qubernatorlarından olan Skot Frimanla müzakirələr aparıb.
Qeyd edilir ki, bu il Akademiya Fondu Gənclər Mükafatını “Ən yaxşı dram”, “Ən yaxşı komediya janrında serial”, “Ən yaxşı animasiya”, “Ən yaxşı qeyri-oyun serialı”, “Ən yaxşı sənədli film” nominasiyaları üzrə təqdim edib. Münsiflər heyəti bir ay ərzində filmlərin səsverməsində iştirak edərək nominantları müəyyən edib.
1977-ci ildən etibarən keçirilən “College Awards”, kino və televiziya sahəsinə üz tutan gənclərin yaradıcılığını stimullaşdırmaq, yeni istedadların üzə çıxarılması məqsədini daşıyır.
