BAYRAQDAR MEDİA – Türkiyədə baş vermiş zəlzələ nəticəsində xəsarət alanlara tibbi yardım göstərmək məqsədilə qardaş ölkəyə ezam olunmuş Azərbaycan Ordusunun hərbi tibb personalı müdafiə nazirinin müvafiq əmrinə əsasən təltif olunub.
Bu haqda xəbər BAYRAQDAR MEDİA-ya martın 29-da Müdafiə Nazirliyindən daxil olub.
Xəbərdə deyilir ki, “martın 29-da MN-nin Baş Klinik Hospitalında təltif olunan hərbi qulluqçuların təqdimat mərasimi keçirilib. Əvvəlcə Ümummilli Lider Heydər Əliyevin, Azərbaycanın müstəqilliyi və ərazi bütövlüyü uğrunda şəhid olanların, eləcə də Türkiyədə baş vermiş zəlzələ nəticəsində həlak olanların xatirəsi bir dəqiqəlik sükutla yad edilib. Sonra müdafiə naziri general-polkovnik Zakir Həsənovun Azərbaycanın tibb personalının təltif olunması ilə bağlı müvafiq əmri oxunub”.
Daha sonra Tibb İdarəsinin rəisi, tibb xidməti general-mayoru Firudin Nəbiyev çıxış edərək bildirib ki, Prezident İlham Əliyevin göstərişinə əsasən Türkiyəyə ezam olunan tibb heyətinin fəaliyyəti qardaş ölkədə də yüksək qiymətləndirilib. Qeyd olunub ki, hərbi tibb personalı Kahramanmaraşda Türkiyə Səhiyyə Nazirliyinin və Türkiyə Silahlı Qüvvələrinin nümayəndələri ilə qarşılıqlı əlaqədə, ümumilikdə 81 cərrahi əməliyyat icra edib, 517 nəfərə isə ambulator yardım göstərib.
Xəbərdə həmçinin qeyd olunub ki, “tədbirdə Azərbaycanın hərbi həkimlərinin Vətən müharibəsində də peşəkarlıq nümayiş etdirdiyi və Azərbaycan Prezidenti, həmçinin MN-nin rəhbərliyi tərəfindən yüksək qiymətləndirildiyi xüsusi vurğulanıb”.
Tədbirin sonunda ümumi cərrah, travmatoloq, LOR cərrah, oftalmoloq, neyrocərrah, revmatoloq, anestezioloq, plastik-rekonstruktiv cərrah, feldşer, əməliyyat tibb bacıları və anestezistlər olmaqla, Azərbaycan Ordusunun 20 nəfərlik hərbi tibb personalına növbəti hərbi rütbə, medal və fəxri fərmanlar təqdim olunub.
