Emin Həsənli: Rusiya sülhməramlıları da, Ermənistan da unutmamalıdır ki, artıq zaman da, şərtlər də dəyişib
BAYRAQDAR MEDİA – “Ermənistan heç zaman götürdüyü öhdəlikləri yerinə yetirməyib. Yerinə yetirsəydi münaqişə bu qədər uzanmazdı. Təəssüflər olsun ki, beynəlxalq birlik də Ermənistanı bu öhdəlikləri yerinə yetirməyə məcbur etmir”.
Bunu Ermənistanın son təxribatçı addımlarını BAYRAQDAR MEDİA üçün dəyərləndirən “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli deyib.
Onun sözlərinə görə, 2020-ci ilin Vətən müharibəsindən sonra bir çoxları gözləyirdi ki, Ermənistanın hərbi və siyasi rəhbərliyi nəhayət ki, ağlını başına yığacaq: “Lakin bu baş vermədi. Ermənistan xarici güclərin də təhrikindən ruhlanaraq həm 2020, həm də 2021-ci ildə üzərinə götürdüyü öhdəlikləri yerinə yetirmədi. Baxmayaraq ki, Avropa Birliyinin, Rusiyanın, daha sonra da ABŞ-ın vasitəçiliyi ilə danışıqlar keçirildi, Ermənistan yenə dağıdıcı, regiona əbədi sülh deyil, yeni müharibə vəd edən yanaşmasından əl çəkmədi”.
E.Həsənli qeyd edib ki, xüsusilə 2020-ci il üçtərəfli Bəyanatının iki vacib bəndinin yerinə yetirilməməsi bu gün təxribatların davam etməsinə yol açıb: “Bəlli olduğu kimi, həmin bəndlərə əsasən qanunsuz erməni silahlı birləşmələri və Ermənistan ordusu Qarabağdan çıxarılmalı, həmçinin, Zəngəzur dəhlizi açılmalı idi. Ermənistan nəinki bu bəndləri yerinə yetirməyib, eyni zamanda Qarabağın Rusiya sülhməramlılarının müvəqqəti nəzarətində olan hissəsindən erməni terrorçularına silahlar daşıyır və silsilə təxribatlar törədir. Təbii ki, Azərbaycan buna dözmək fikrində deyil. Ona görə də Azərbaycan Ordusu tərəfindən lazımlı addımlar atılır. Ümumiyyətlə, Rusiya sülhməramlıları da, Ermənistan da unutmamalıdır ki, artıq zaman da, şərtlər də dəyişib. İndi 1980-ci illərin sonu deyil. Bu gün bölgədə öz Zəfəri ilə yeni reallıqlar yaradan güclü Azərbaycan və bu dövlətin qətiyyətli lideri var”.
Müsahibimiz əlavə edib ki, bu gün Ermənistan xarici güclərin təhriki ilə ağılsız addımlar atmaqdansa reallıqla barışmalı, reallığı düzgün dəyərləndirməlidir: “Əks təqdirdə Ermənistan 2020-ci ildə olduğu kimi bir daha Azərbaycanın dəmir yumruğunu öz başı üzərində görəcək. Dəfələrlə dediyimizi növbəti dəfə təkrar edirəm. Budəfəki zərbə Ermənistan üçün ölümcül olacaq. Buna kimsə şübhə etməsin. Bunu deməklə yanaşı Qarabağda yaşayan ermənilərə müraciət də edirəm. Onlar ya vaxt itirmədən Azərbaycan qanunlarına tabe olmalı, ya da Ermənistana getməlidirlər. Çünki tez bir zamanda Xankəndi və ətraf ərazilərdə də Azərbaycan bayrağı dalğalanacaq və Azərbaycan qanunları işləyəcək”.
