Son yeniləmə: 27 Mart 2023 14:03
BAYRAQDAR MEDİA – İqtisadiyyat Nazirliyi yanında Dövlət Vergi Xidməti (DVX) martın 27-dən başlayaraq ali təhsil müəssisələrinin tələbələri üçün iki hissədən ibarət olan sayca ikinci “Yay Təcrübə Proqramı”na qəbul elan edib.
Bu barədə BAYRAQDAR MEDİA-ya martın 27-də Dövlət Vergi Xidmətindən məlumat verilib.
Məlumatda qeyd edilib ki, “proqramda iştirak etmək istəyən tələbələr qeyd olunan tarixdən etibarən Xidmətə müraciət etməklə proqramın seçim turlarına qoşula bilərlər. “Yay Təcrübə Proqramı”nın seçim turu 3 mərhələdən ibarət olacaq. 1-ci mərhələ sənəd qəbulu üzrə ilkin yoxlamanın aparılması, 2-ci mərhələ namizədlərin özünütəqdimat video çıxışlarının dəyərləndirilməsi, 3-cü mərhələ isə namizədlərin keys əsaslı qrup tapşırıqları üzrə qiymətləndirilməsi ilə bağlıdır. Hər üç mərhələdən uğurla keçən namizədlər 7 gün müddətində DVX-nin Şamaxı rayonunda yerləşən Tədris Mərkəzində təşkil ediləcək yay düşərgəsində iştirak hüququ qazanacaqlar. Tədris Mərkəzində onlara peşəkar təlimçilər tərəfindən vergi inzibatçılığı və digər mövzularda təlimlər təşkil olunacaq. Daha sonra tələbələr DVX-nin Bakıda və regionlarda yerləşən struktur bölmələrində 8 həftə müddətində təcrübə keçəcəklər. “Yay Təcrübə Proqramı” 2023-cü il iyulun 7-dən sentyabrın 8-dək davam edəcək”.
Məlumata əsasən, proqramda iştirak üçün sənəd qəbulu tecrube@taxes.gov.az elektron poçt ünvanı vasitəsilə martın 27-dən aprelin 30-dək həyata keçiriləcək: “Müraciətlər göndərilərkən (mövzu hissəsində “Yay Təcrübə Proqramı 2023” qeyd etməklə) şəxsiyyət vəsiqəsi, tələbə bileti və akademik transkript mütləq qaydada fayl şəklində məktuba əlavə olunmalıdır. Proqramda yalnız Azərbaycan vətəndaşları iştirak edə bilər. Namizədlərdən, həmçinin yerli və ya xarici dövlətlərin ali təhsil müəssisələrinin 4-cü kurs bakalavriat pilləsində, yaxud 1-ci və ya 2-ci kurs magistratura pilləsində iqtisadiyyat, hüquq, idarəetmə ixtisas istiqamətləri üzrə təhsil almaqları, habelə cari tədris ilinin payız semestri üzrə ümumi orta müvəffəqiyyət göstəricisinin 80 baldan (4 ballıq sistem üzərindən 3 baldan) yuxarı olmaları tələb olunur”.
O da bildirilib ki, “Yay Təcrübə Proqramı”nın əsas məqsədi tələbələrin bilik və bacarıqlarının artırılmasına, şəxsi inkişafına dəstək verməkdir: “Tələbələr təcrübə proqramı vasitəsilə nəzəri biliklərini praktikada tətbiq etmək, vergi sahəsində yeni bilik və bacarıqlar formalaşdırmaq imkanı qazanacaqlar. Ötən il “Yay Təcrübə Proqramı”nda yüksək nəticələr əldə etmiş tələbələrdən 3-ü işə qəbul üzrə müsabiqədən uğurla keçərək DVX-nin ehtiyat kadrlar bazasına daxil edilib”.
