BAYRAQDAR MEDİA – Prezident İlham Əliyev, birinci xanım Mehriban Əliyeva və qızları Arzu Əliyeva martın 18-də Tərtər rayonuna səfər edib.
Xəbəri Prezidentin Mətbuat xidməti yayıb.
Xəbərdə deyilir ki, dövlət başçısı Talış-Tapqaraqoyunlu-Qaşaltı sanatoriyası yolunun açılışında iştirak edib.
Daha sonra İ.Əliyev, M.Əliyeva və A.Əliyeva Suqovuşan qəsəbəsində orta məktəb binasında yaradılan şəraitlə tanış olub, yaşayış məhəlləsinin təməlqoyma mərasimində iştirak edib.
Onlar Suqovuşan su anbarının və ondan çıxan magistral su kanalının əsaslı təmiri, anbar boyunca yaradılan turizm infrastruktur obyektlərinin tikintisi ilə də tanış olublar.
Onlar Tərtər rayonunun Talış kəndinə gələrək burada kəndin Baş planı ilə tanış olub, inzibati binada, uşaq bağçasında, tam orta məktəbdə yaradılan şəraitə də baxıblar.
Sonra dövlət başçısı Talış kəndində Novruz tonqalını alovlandırıb və Azərbaycan xalqını bayram münasibətilə təbrik edib.
Bunun ardından da onlar Klub icma mərkəzində yaradılan şəraitlə tanış olaraq kənd sakinləri ilə söhbət ediblər.
