Son yeniləmə: 17 Mart 2023 15:46
BAYRAQDAR MEDİA – Denizli Böyükşəhər Bələdiyyəsinin bu il üçüncü dəfə təşkil etdiyi Beynəlxalq Karikatura Müsabiqəsinin nəticələri açıqlanıb. Mövzusu “Sağlam həyat və idman” olan müsabiqəyə bu il 33 ölkədən 348 həvəskar və peşəkar rəssam 682 əsərlə qatılıb.
Bu barədə BAYRAQDAR MEDİA-ya Denizli Böyükşəhər Bələdiyyəsindən məlumat verilib.
Bildirilib ki, münsiflər heyəti əsərləri bir-bir araşdıraraq qalibləri müəyyən edib. Mayın 5-də mükafatlandırma mərasimi və sərgi olacaq.
Məlumata əsasən, müsabiqənin 18 yaşdan yuxarı kateqoriyasında çinli Liu Qianqın işi birinci, ukraynalı Oleksiy Kustovskinin işi ikinci, ukraynalı Vladimir Kazanevskinin işi isə üçüncü yeri tutub.
Denizli Böyükşəhər Bələdiyyəsinin başqanı Osman Zolan artıq üçüncü dəfə təşkil edilən müsabiqəyə böyük marağın olduğunu bildirib. O, “Hər bir iştirakçımız gözəl əsərləri ilə sağlam həyat və idman mövzusuna diqqət çəkdi və bu mövzuda hazırladıqları əsərlərlə maarifləndirdi. Əsərlərini müsabiqəmizə göndərən bütün iştirakçılara təşəkkürümü bildirirəm və mükafat qazanan rəssamları təbrik edirəm” deyib.
