Son yeniləmə: 14 Mart 2023 09:41
BAYRAQDAR MEDİA – Martın 15-də Norveçin paytaxtı Osloda növbəti “Odin seminarları – Sərhədlərə yox” adlı tədbir işinə başlayır.
Bu haqda xəbəri BAYRAQDAR MEDİA-ya seminarın təşkilatçısı olan komandanın üzvü, əslən Güney Azərbaycanlı Norveç vətəndaşı Şervin Nəcəfpur verib.
Ş.Nəcəfpur birldirib ki, seminarın təşkilatçıları Vestfold Muzeyləri, Midgard Viking Mərkəzi və Tur Heyerdal İnstitutudur.
O da bildirilib ki, seminarlara Norveçdəki Azərbaycan, Qazaxıstan və Türkiyə səfirlikləri də dəstək verir.
Tədbirin mövzusuna gəlincə, Ş.Nəcəfpur bildirib ki, bu, məşhur səyyah Tur Heyerdalın sonuncu araşdırmalarına həsr edilir.
Ş.Nəcəfpur qeyd edib ki, T.Heyerdalın Skandinaviya allahı Odin ilə bağlı son araşdırmaları ciddi fikir ayrılıqlarına səbəb olub. Özəlliklə də elm aləmində bu yöndə qızğın müzakirələr gedib.
“Mən özüm də üç ildir ki, Vestfold Muzeyləri və Tur Heyerdal İnstitutu ilə iş birliyi edirəm. Sözügedən layihədə koordinatoram və yetərincə maraqlı bir iş birliyimiz var. Məqsədimiz Qərbi Şərqə yaxınlaşdırmaq, insanlar və bölgələr arasında münasibətlərə töhfə verməkdir. Ona görə də bu seminarlara Azərbaycan, Qazaxıstan və Türkiyə olmaqla üç türk dövlətini də cəlb etmişik”, – deyə Ş.Nəcəfpur bildirib.
