Son yeniləmə: 14 Mart 2023 13:24
Martın 16-da “Ənənəvi Novruz” festivalı olacaq
BAYRAQDAR MEDİA – Fəaliyyətə başladığı vaxtdan etibarən Novruz bayramına xüsusi diqqətlə yanaşan “ABAD” (Ailə Biznesinə Asan Dəstək publik hüquqi şəxs) bu il də ənənəsinə sadiq qalır. Qurum hər il olduğu kimi bu il də Novruz bayramına özünəməxsus şəkildə hazırlaşıb.
ABAD-dan BAYARQDAR MEDİA-ya verilən məlumat görə, martın 16-da “İçərişəhər” Dövlət Tarix-Memarlıq Qoruğunda yerləşən “ABAD” etno-butikində “Ənənəvi Novruz” adlı festivalı keçiriləcək.
Məlumata əsasən, bu festival Azərbaycan xalqının ən qiymətli milli-mənəvi dəyərlərindən biri olan Novruz bayramını, onun mənşəyi, tarixi və adətlərini özündə təcəssüm etdirəcək: “Festivalda Novruz bayramının ənənələri təbliğ ediləcək, həmçinin “ABAD”çıların Novruz mövzusunda məhsulları qonaqlara təqdim olunacaq”.
Bundan başqa festivalın qonaqları ənənəvi Novruz süfrəsinin yığılmağını seyr edərək, süfrəyə düzülən nemətlərin rəmzi mənası haqqında məlumatlar əldə edəcəklər.
Lakin bu da son deyil. Festival çərçivəsində xüsusi hazırlanmış zonalarda Novruz adətlərinə uyğun əyləncələr təqdim ediləcək. Qonaqlar Novruz falları, hədiyyəli yumurta döyüşü, yumurta bəzədilməsi master klassı, xınayaxdı, xonça bəzəməsi master klassı, milli fotosessiya, milli musiqi və s. ibarət proqram təqdim olunacaq.
O da qeyd edilib ki, festivala qatılacaq qonaqların milli geyimdə olmaları arzuediləndir.
