Son yeniləmə: 10 Mart 2023 13:56
BAYRAQDAR MEDİA – Norveç-Azərbaycan Gənclər Təşkilatının (NAYO) nəzdində fəaliyyət göstərən Nizami Gəncəvi adına Azərbaycan dili və mədəniyyəti həftəsonu məktəbində yeni layihəyə başlanılıb.
Bu barədə BAYRAQDAR MEDİA-ya martın 10-da Diasporla İş üzrə Dövlət Komitəsindən məlumat verilib.
Bildirilib ki, Diasporla İş üzrə Dövlət Komitəsinin dəstəyi ilə həyata keçirilən layihə çərçivəsində məktəbəqədər uşaqlar üçün təlim-tədris kursları təşkil olunub: “Kurslar kiçik yaşlı soydaşlarımızın böyük marağına səbəb olub. Həvəslə kurslara gələn uşaqlar burada Azərbaycan dilini, milli adət-ənənələrimizi və tariximizi öyrənir, həm də müxtəlif üsullarla əylənirlər”.
Məlumata əsasən, azərbaycanlı uşaqların təlim-tərbiyəsi ilə Təranə Mirzağayeva məşğul olur. Dərslər bazar günləri NAYO-nun ofisində keçirilir. Marağı olan hər bir kiçik yaşlı soydaşımıza kurslara qatılmaq və təlim-tədris prosesində iştirak etmək imkanı verilir.
