BAYRAQDAR MEDİA – Xəbər verildiyi kimi, martın 1-dən populyar onlayn TV kanalları olan Müsavat TV və Səs TV-nin Youtube platformaları hakerlər tərəfindən ələ keçirilib. Bununla bağlı hər iki media qurumu ictimaiyyəti bilgiləndirib. Qeyd olunur ki, kanalların bərpası istiqamətində gərəkli addımlar atılır.
Öz növbəsində “Yeni Müsavat” Media Group-un rəhbəri Rauf Arifoğlu deyib ki, “Naməlum xakerlər tərəfindən ələ keçirilmiş “TV Musavat” kanalının bərpa edilməsi istiqamətində fəaliyyət davam edir”.
R.Arifoğlu bildirib ki, ötən axşam 21:41 radələrində “TV Musavat”ın YouTube platformasına hücum olunub: “Öncə kanalın bağlı olduğu elektron poçt ünvanı ələ keçirilib. Daha sonra həmin ünvana bağlı olan YouTube kanalı ələ keçirilərək, adı dəyişdirilib, videolarımız silinib. Hakerlər kanalımıza “Tesla” adı qoyublar. 286 min abunəsi olan platformadan bu gecə saxta kriptovalyuta satışı həyata keçirilib. Kanala 7 oyun yerləşdirilib. Prezident Administrasiyası, Dövlət Təhlükəsizlik Xidməti (DTX), Rəqəmsal İnkişaf və Nəqliyyat Nazirliyi məlumatlandırılıb. Gecə saatlarına qədər DTX-nın aidiyyəti idarəsi bununla bağlı müvafiq işlər görüb”. O da qeyd edilib ki, “YouTube” mərkəzi ofisinə də məlumat verilib: “Məlum olub ki, bu, sadə dələduzluq hadisəsi deyil, ölkəmizin kibertəhlükəsizliyinə təhdiddir. Belə ki, ələ keçirilmiş “TV Musavat” kanalından abonentlərə viruslu linklər göndərilir. Bu da o deməkdir ki, genişmiqyaslı, dövlət səviyyəsində kibertəhlükəsizlik proseduru işə salınmalıdır. Ən qısa zamanda “TV Musavat” kanalının geri qaytarılması üçün bütün müvafiq tədbirlər görülür”.
