BAYRAQDAR MEDİA – 2 mart 2023-cü il tarixinə olan məlumatlara görə, üç il öncə başlamış COVID-19 pandemiyası 680 milyon 185 minədək insanın xəstələnməsinə səbəb olub. Yoluxanlardan 6 milyon 802 minə yaxını bu xəstəlikdən dünyasını dəyişib. Bu isə nisbət etibarı ilə 1 faiz deməkdir.
O da bildirilir ki, bu günə kimi 653 milyon insan COVID-19 yoluxmasından sağalaraq çıxıb. Yerdə qalan rəqəm isə hazırda hələ də xəstə olanları ifadə edir.
Rəqəmlər worldometers.info saytında canlı olaraq yenilənir.
Ötən dövr ərzində ən çox gündəlik yoluxma 21 yanvar 2022-ci ildə qeydə alınıb. Həmin gün dünya üzərində 3 milyon 851 minə yaxın insan bu xəstəliyə yoluxub.
COVID-19-dan ən çox ölüm də eyni gündə qeydə alınmaqla 16 min 878 nəfər təşkil edib.
İndi isə vəziyyət köklü şəkildə dəyişib. Martın 2-sinə olan rəqəmlər pandemiyanın əməlli-başlı səngidiyindən xəbər verir.
Martın 1-nə olan son rəqəmlərə görə həmin gün 134 mindən bir az artıq sayda insan bu xəstəliyə yoluxub. Eyni gündə ölüm sayı da böyük rəqəmlə ifadə edilmir: 694 nəfər.
Fevralın 28-nə olan məlumatda isə yoluxma sayı 125 min nəfər, ölüm sayı 637 nəfər təşkil edib.
Əlbəttə, bunlar rəsmi olaraq qeydə alınan yoluxma və ölüm saylarıdır.
Ümumilikdə rəqəmlərin dinamikası göstərir ki, pandemiya artıq sona çatmış elan edilə bilər. Çünki COVID-19-dan ölüm sayları digər xəstəliklərdən, hətta yol qəzalarında ölənlərin sayından da aşağıdır. Elə yoluxma sayı da həyəcana səbəb olacaq həddə deyil.
